हडपसर, ता. २ : खून झाल्याची माहिती देणारा मित्रच खुनी निघाल्याची घटना उंड्री- हांडेवाडी रस्त्यावर घडली. काळेपडळ पोलिसांनी संशयिताला अवघ्या दोन तासांतच जेरबंद केले आहे. शनिवारी (ता. २) पहाटे पाचच्या सुमारास ही घटना घडली असून, त्यामध्ये रविकुमार शिवशंकर यादव (वय ३३ ) याचा खून झाला आहे.
काळेपडळ पोलिस ठाण्याचे पोलिस निरीक्षक मानसिंग पाटील यांनी दिलेल्या माहितीनुसार, शनिवारी पहाटे पाचच्या सुमारास किसन राजमंगल साहा (वय २०, रा. अजगारवा, बिहार) याने पुणे पोलिस कंट्रोल रूम येथे ११२ क्रमांकावरून संपर्क करून, आपला मित्र रविकुमार याने स्वतःच्या दुकानातून बेडशीट व गादी दिली नाही म्हणून चौघांनी दुचाकीवरून येत त्याच्या डोक्यात लोखंडी पहार मारुन गंभीर जखमी केले व निघून गेले आहेत, असा निरोप दिला होता. त्यानुसार महमंदवाडी बीट मार्शल व रात्रगस्त अधिकारी यांनी घटनास्थळी जाऊन साईगंगा सोसायटीसमोरील पत्र्याच्या शेडमध्ये पाहणी केली. तेथे रविकुमार रक्ताच्या थारोळ्यात पडलेला दिसला. डॉक्टरांनी त्याची तपासणी केली असता, त्याचा मृत्यू झाल्याचे स्पष्ट झाले.
दरम्यान, फोन केलेल्या तरुणाकडे घडलेल्या घटनेविषयी सखोल चौकशी केली असता, त्यांच्या सांगण्यामध्ये विसंगती दिसून आली. परिसरातील सीसीटीव्ही फुटेजची पाहणी केल्यावर घटनास्थळावर मोटारसायकलवरुन आलेल्या अनोळखी चार जणांची कोणत्याही प्रकारची हालचाल दिसून आली नाही. त्यामुळे पोलिसांच्या संशयाची सुई फोन करून माहिती देणाऱ्या तरूणाकडे फिरली.
पोलिसांनी खाक्या दाखविल्यानंतर किसन याने खुनाची कबुली दिली आहे.
......................................