कात्रज, ता. २ ः महावितरणच्या पुणे परिमंडळात मोठा प्रशासकीय बदल करत पद्मावती विभाग आणि धनकवडी उपविभागातील आंबेगाव व कात्रज शाखा कार्यालयांचे विभाजन करण्याचा निर्णय घेण्यात आला आहे. त्यानुसार आंबेगावचे विभाजन करून शिवसृष्टी आणि कात्रजचे विभाजन करून टिळेकरनगर या दोन नवीन शाखा कार्यालयांची निर्मिती करण्यात येणार आहे.
विभाजनानंतर नवीन व जुन्या अशा चार शाखांवर प्रत्येकी १९ पदांप्रमाणे एकूण ७६ पदे कार्यरत राहणार असून, यातील नवीन ३८ पदे शिवसृष्टी व टिळेकरनगर शाखांसाठी नव्याने मंजूर करण्यात आली आहेत. एकूण ३८ नव्या पदांपैकी ८ तंत्रज्ञांची पदे विद्यमान शाखांमधून वळती करून ६ तंत्रज्ञांची पदे सांघिक संचयातून वळती करण्यात येतील. २४ पदांची नव्याने भरती करण्यात येईल. यामध्ये २ सहाय्यक अभियंता, २ कनिष्ठ कार्यालयीन सहाय्यक, ४ प्रधान तंत्रज्ञ, १२ वरिष्ठ तंत्रज्ञ व ४ तंत्रज्ञांचा समावेश आहे.
महावितरणने घेतलेल्या या निर्णयामुळे पुणे शहरातील धनकवडी उपविभागातील कार्यक्षमता वाढणार असून, नागरिकांना वीजवाटप व देखभालीसंबंधी अधिक जलद सेवा मिळण्याची अपेक्षा आहे. स्थानिक लोकसंख्या वाढीचा विचार करता, ही यंत्रणा अधिक सक्षम करण्यासाठीचे पाऊल असल्याची भावना नागरिकांतून व्यक्त करण्यात येत आहे.
-------
प्रशासकीय खर्चासाठी आर्थिक तरतूद
या दोन्ही शाखांवरील पदनिर्मितीचा वार्षिक खर्च १ कोटी ९१ लाख १२ हजार ९२८ रुपये असून, २२ लाख ९६ हजार रुपयांच्या प्रशासकीय खर्चासाठी मंजुरी देण्यात आली आहे. हा आदेश महावितरणचे मुख्य महाव्यवस्थापक भूषण कुलकर्णी यांच्या आदेशान्वये काढण्यात आलेला आहे.
----------