वाघोली, ता. २० : ठाणे अंमलदार कक्षात आलेल्या तरुणाने गोंधळ घालत हातात आणलेल्या बॉटलमधील डिझेल स्वतःच्या अंगावर ओतून पेटवून घेण्याचा प्रयत्न केला. पोलिसांनी त्याला रोखले. ही घटना लोणीकंद पोलिस ठाण्यात घडली. कौटुंबिक वादातून मद्याच्या नशेत त्याने हा प्रकार केल्याचे पोलिसांकडून सांगण्यात आले.
वैद्यकीय तपासणी केली असता त्याने मद्यप्राशन केल्याचे निष्पन्न झाले आहे. याप्रकरणी सौरभ पोटभरे (वय २५, रा. पेरणे फाटा) असे गुन्हा दाखल झालेल्या तरुणाचे नाव आहे. याबाबत ठाणे अंमलदार मच्छिंद्र वाळके यांनी फिर्याद दिली.सौरभ व त्याची पत्नी या दोघांमध्ये वाद झाला होता. सौरभ याच्या पत्नीने लोणीकंद पोलिस ठाणे गाठत तक्रार दिली होती. तसेच, घरी परतण्यास तिने नकार दिला होता. या रागातून सौरभ याने मद्यप्राशन करून पोलिस ठाण्यात येत पेटवून घेण्याचा प्रयत्न केला.