वाघोली, ता. १० : वाघोलीतील भैरवनाथ तळ्याच्या मागे कुस्ती आखाड्याजवळ गांजा बाळगणाऱ्या तिघांना वाघोली पोलिसांनी अटक केली. त्यांच्याकडे ३० हजार रुपये किमतीचा दीड किलो गांजा आढळून आला.
सौरभ अशोक साबळे (वय २३, रा. रणगाव ता. इंदापूर), समर्थ दत्तात्रेय बनसोडे (वय २३, रा. कळंब ता. इंदापूर), टेंपोचालक अमिन रहिमतुल्ला डांगे (वय २३, रा. वालचंदनगर ता. इंदापूर) अशी अटक केलेल्या संशयितांची नावे आहेत. या प्रकरणी पोलिस अंमलदार पांडुरंग चंद्रकांत माने यांनी फिर्याद दिली आहे. पोलिसांनी दिलेल्या माहितीनुसार, तिघे जण कुस्ती आखाड्याजवळ आले असून, त्यांच्याकडे गांजा असल्याची माहिती मिळाली. पोलिसांनी तेथे जाऊन त्यांना ताब्यात घेतले. त्यांच्याकडून गांजा, गुन्ह्यात वापरलेला टेम्पो आणि मोबाईल जप्त करण्यात आला. वरिष्ठ पोलिस निरीक्षक युवराज हांडे यांच्या मार्गदर्शनाखाली ही कारवाई करण्यात आली.