मार्केट यार्ड, ता. १९ : सनई-चौघड्यांच्या निनादात आणि तुतारीच्या गजरात येथे ‘श्रीं’चे आगमन झाले. प्रतिष्ठापनेपूर्वी दुपारी ११ वाजून ११ मिनीटांनी पुणे कृषी उत्पन्न बाजार समितीच्या मुख्य आवारात शारदा-गजाननाची मिरवणूक काढण्यात आली. याप्रसंगी स्वरांजली बॅंड पथकाने वादन करत मिरवणुकीत रंग आणला. बाजार समितीचे संचालक गणेश घुले, अनिरुद्ध भोसले, संतोष नांगरे, युवराज काची, राजेंद्र सूर्यवंशी यांच्यासह अडतदार, व्यापारी, हमाल, तोलणार, वारणार, बाजार समितीचे कर्मचारी मिरवणुकीत सहभागी झाले होते. मंडळाचे अध्यक्ष सागर भोसले व कार्याध्यक्ष प्रसाद गव्हाणे यांनी सपत्नीक पूजा करत शारदा गजाननाची प्रतिष्ठापना केली.