मार्केट यार्ड, ता. १ : गोडधोड विक्रीत उत्साहाचे वातावरण असून, ग्राहक मोठ्या प्रमाणावर विविध प्रकारच्या मिठाईची खरेदी करत आहेत. वाढत्या मागणीमुळे पेढे आणि बर्फीच्या भावात यंदा मागील वर्षाच्या तुलनेत सुमारे २० टक्क्यांनी वाढ झाली आहे.
वाहनांची पूजा, कार्यालये, विविध प्रकारची दुकाने, कारखान्यांची पूजा केली जाते. व्यावसायिक व्यवसायाच्या ठिकाणी पूजा करत असतात. तसेच आजच्या दिवशी कर्मचाऱ्यांना मिठाई वाटण्याची प्रथा आहे. त्यामुळे मिठाई खरेदीच्या प्रमाणात वाढ झाली आहे. मिठाई खरेदी करताना ग्राहक धारवाडी पेढ्यांना प्राधान्य देत आहेत. तसेच काजू कतली, बुंकीचे लाडू, सुके जामून, मलाई पिस्ता, मलई केशर, खोबर बर्फी, म्हैसूर पाक, बेसनचे लाडू, जिलेबी आदीला ग्राहकांकडून मागणी होत असल्याचेही विक्रेत्यांनी नमूद केले.

पेढे आणि मिठाईचे किलोचे दर ६०० ते ८०० रुपयांच्या दरम्यान आहेत. तर विविध प्रकारच्या लाडूनचे दर ५०० ते ७०० रुपयांच्या दरम्यान आहेत. म्हैसूरपाक, जामून आदींचे दर २०० ते ४०० रुपये दरम्यान आहेत. ग्राहकांची मागणी लक्षात घेवून मागील मिठाई विक्रेत्यांनी विविध प्रकारचे पेढे, बर्फी, लाडू तयार करून ठेवले आहेत.

दोन दिवसांपासून पेढे खरेदीसाठी येणाऱ्या ग्राहकांची संख्या वाढली आहे. गुरुवारी पेढ्यांना मागणी कायम असणार आहे. मागील वर्षीच्या तुलनेत यंदा मागणीत लक्षणीय वाढ झाली आहे. दरवर्षी विजया दसऱ्यानिमित्त विविध प्रकारच्या पेढ्यांना मागणी असते. मात्र यंदा आमच्याकडे सर्वाधिक धारवाडी पेढ्यांना मागणी आहे. मागणीप्रमाणे आम्ही पेढे उपलब्ध करत आहोत.
- अभिजीत साळुंके, पेढे विक्रेते.