वेल्हे, (पुणे) - गेल्या दोन वर्षांपूर्वी गडावरील हनुमान बुर्जापर्यंत पोहोचलेली विद्युत सेवा ही अखेर नवरात्र उत्सवाच्या निमित्ताने गडावरील मेंगाई देवीच्या मंदिर व परिसरात पोहोचल्याने शिवभक्त सह नागरिक व भाविकांनी मोठे समाधान व्यक्त केले आहे.

खासदार सुप्रिया सुळे यांच्या मार्गदर्शनाखाली महावितरणचे समन्वयक व पुणे जिल्हा बँकेचे संचालक प्रवीण शिंदे यांच्या कार्य तत्परतेमुळे व प्रशासन, स्थानिक ग्रामस्थांच्या मदतीने गडावरील शिवकालीन श्री मेंगाईदेवी मंदिरात विद्युतीकरण करण्यात आले आहे.

आकर्षक विद्युत रोषणाईने ऐन नवरात्र उत्सवात मंदिर व गडाचा परिसर उजळून निघाला आहे. नवरात्र उत्सवात गडावर विजेचा लखलखाट झाल्याने पर्यटकांसह भाविकांची गैरसोय दूर झाली आहे.

गेल्या कित्येक वर्षापासून गडावरील श्री मेंगाई मंदिरासह सर्व ऐतिहासिक वास्तू, स्थळे अंधारातच होती. दोन वर्षांपूर्वी किल्ले तोरणा गडावरील हनुमान बुरुजा पर्यंत विद्युतीकरण झाले होते. परंतु प्रत्यक्षात येथील ऐतिहासिक मंदिरांमध्ये लाईट पोहोचली नव्हती.

या तरी वर्षी नवरात्र उत्सवामध्ये या मंदिरांमध्ये लाईट पोचण्यासाठी वेल्हे येथील ग्रामस्थांनी खासदार सुप्रिया सुळे यांना साकडे घातले. त्याची दखल घेत जिल्हा बँकेचे संचालक प्रवीण शिंदे, महावितरणचे कार्यकारी अभियंता टी. राठोड आदींनी एस. टी. राठोड आदींनी वीजपुरवठ्यासाठी लक्ष घातले.

उपविभागीय अभियंता नवनाथ घाटुळे यांनी बुरुजापासून मंदिरापर्यंत जवळपास एक किलोमीटर अंतराची केबल उपलब्ध केली. वेल्हे येथील शाखा अभियंता विनोद थाटे, संतोष शिंदे, कर्मचारी गणेश शिंदे, अमोल डांगे, संदीप दर्डींगे, पुरातत्व खात्याचे पाहरेकरी दादू वेगरे आदींनी परिश्रम घेत मंदिरात वीजपुरवठा सुरू केला.

तोरणागडावर वीजपुरवठा व्हावा, यासाठी ज्येष्ठ कार्यकर्ते शंकरराव भुरुक, माजी जिल्हा परिषद सदस्य आनंद देशमाने, माजी उपसरपंच सुनील राजिवडे, प्रदीप मरळ, मंगेश कोडातकर, हे प्रयत्नशील होते. याबाबत गडाच्या बुरुजापासून श्री मेंगाई मंदिरांसह व ऐतिहासिक वास्तू, प्रवेश- द्वाराच्या परिसरात विद्युतीकरण करण्यात येणार आहे, त्यासाठी कार्यवाही असल्याची माहिती पुरातत्व विभागाचे सहसंचालक डॉ. विलास वाहने यांनी दिली.