वेल्हे : वेल्हे तालुक्यातील ऐतिहासिक किल्ले राजगड, किल्ले तोरणा येथे जाण्यास पर्यटकांना लॅाकडाऊन असेपर्यत बंदी घालण्यात आली असल्याचा निर्णय शुक्रवार (ता.११) आयोजित तालुकास्तरीय बैठकीत घेण्यात आला.

वेल्हे तहसील कार्यालयात या बैठकीचे आयोजन करण्यात आले होते यावेळी तहसिलदार शिवाजी शिंदे, सहाय्यक पोलीस निरीक्षक मनोज पवार, गोपनीय विभागाचे अभय बर्गे, पोलीस पाटील संघटनेचे अध्यक्ष बाळासाहेब रसाळ, वेल्ह्याचे सरपंच संदीप नगिने, राजगड पायथा पाल बुद्रुकचे सरपंच गोरक्ष शिर्कें, संतोष मोरे, आदीसह किल्यांच्या पायथ्याशी असलेल्या गावचे सरपंच उपस्थित होते.

५ जुन रोजी किल्ले तोरणा किल्ल्यावरील बुरुजांची नासधुस केली होती,तसेच किल्ल्यावर पर्यटकाकडुन मोठ्या प्रमाणावर कचरा राडारोडा इतरत्र टाकला जात आहे.किल्ल्याचे पावित्र्य राखण्यासाठी तसेच लोकांच्या सुरक्षिततेच्या दृष्टिकोनातून किल्ल्यांवर पर्यटकांना जाण्यास बंदी घालण्यात आली आहे.

''किल्ल्यावर मुक्काम करण्यास देखील बंदी असल्याच्या निर्णयाची प्रभावीपणे अंमलबजावणी करण्याच्या सूचना पुरातत्व विभागाने दिल्या आहेत. रात्रीच्या वेळी किल्ल्यावर कोणी सापडला तर त्या पर्यटकावर गुन्हा दाखल करण्यात येईल तसेच वनविभागाकडून किल्ल्याच्या पायथ्याशी असलेल्या गावांमध्ये वनसंरक्षण समिती स्थापन करावी आणि ती कार्यन्वित करुन किल्ल्याच्या पायथ्याजवळ चेकपोस्ट सुरु करावेत'' अशी चर्चा यावेळी करण्यात आली. पोलिसांकडून करंजावणे, चिरमोडी वाजेघर कोंढावळे फाटा या ठिकाणी चेकपोस्ट सुरु असल्याची माहीती सहाय्यक पोलीस निरीक्षक मनोज पवार यांनी दिली.