किरकटवाडी (पुणे) : खडकवासला धरण (Khadakwasla Dam) परिसर पर्यटकांसाठी बंद राहील, असे जिल्हा प्रशासनाचे स्पष्ट आदेश असतानाही पर्यटकांनी जिल्हाधिकाऱ्यांचे आदेश झुगारत खडकवासला धरण परिसरात मोठी गर्दी केल्याचे दिसून आले. खडकवासला धरणाच्या मागील बाजूस असलेल्या पुलावर त्यामुळे वाहतूक कोंडी झाली होती.

- पुणे विभागातून आली दिलासादायक बातमी; कोरोनामुक्तांचा टक्का वाढला!​

खडकवासला धरणातून सध्या सुमारे ११ हजार क्युसेकने मुठा नदी पात्रात पाण्याचा विसर्ग सुरू आहे. दरवर्षी खडकवासला धरणातून पाणी सोडल्यानंतर हे दृश्य पाहण्यासाठी अनेक पर्यटक धरण परिसरात येतात; परंतु यावर्षी कोरोना व्हायरसच्या पार्श्वभूमीवर जिल्हाधिकाऱ्यांनी खडकवासलासह जिल्ह्यातील सर्व पर्यटन स्थळे बंद राहतील, असे आदेश काढले आहेत. मात्र, हे आदेश झुगारत अनेक पर्यटकांनी खडकवासला धरणाच्या मागच्या बाजूला असलेल्या अरुंद पुलावर गर्दी केली होती.

- 'स्मार्ट पोलिसींग'चा उपमुख्यमंत्र्यांच्या हस्ते शुभारंभ; पुणे ग्रामीण पोलिस राबविणार उपक्रम

पर्यटकांनी आपली वाहने रस्त्यातच लावल्याने मोठ्या प्रमाणात वाहतूक कोंडी निर्माण झाली होती. फोटो आणि सेल्फी काढण्याच्या नादात अनेक पर्यटक आपला जीव धोक्यात घालताना दिसून आले. धरणाच्या मागील बाजूस असलेला पूल हा उत्तमनगर पोलीस स्टेशनच्या हद्दीत येतो, मात्र सुरक्षेसाठी पोलीस प्रशासनाकडून कोणतीही खबरदारी घेतली गेली नाही.

- पुढील चार दिवस पावसाचे, मध्य महाराष्ट्रात बरसणार जोरदार पाऊस!​

"सध्या धरणातून अकरा हजार क्युसेकने विसर्ग सुरू आहे. पावसाचे प्रमाण वाढल्याने विसर्ग वाढवण्यात येणार आहे. नागरिकांनी धरण परिसरात फिरण्यासाठी येऊ नये. उत्तमनगर पोलिस स्टेशनशी संपर्क साधून धरणामागील पुलावर तात्काळ सुरक्षेसाठी पोलिस बंदोबस्त लावण्याची मागणी करणार आहे."
- वामन भालेराव, उपअभियंता, स्वारगेट उपविभाग, पाटबंधारे विभाग.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)