पुणे - नगर रचना योजना (टीपी स्किम) राबविल्यामुळे सर्व नागरिकांना फायदा होणार आहे. त्यामुळे शहरालगत नियोजनबद्ध 15 टीपी स्कीम राबविण्यात येणार आहे. हे काम पीएमआरडीए करणार असल्याचे पालकमंत्री गिरीश बापट यांनी सांगितले. 

पुणे महानगर प्रदेश विकास प्राधिकरणाने (पीएमआरडीए) होळकरवाडी (ता. हवेली) येथील रिंगरोडला जोडणाऱ्या नवीन मुख्य होळकरवाडी रस्ता ते कानिफनाथ पायथा रस्ता विस्तारीकरणाचे काम हाती घेण्यात आले आहे. या रस्त्याच्या कामाचे भूमिपूजन बापट यांच्या हस्ते करण्यात आले. त्या वेळी ते बोलत होते. या वेळी जलसंपदा राज्यमंत्री विजय शिवतारे, पीएमआरडीएचे आयुक्त किरण गित्ते, हवेली पंचायत समितीच्या सभापती हेमलता काळोखे, उपसभापती सचिन घुले, होळकरवाडीच्या सरपंच मंगल झांबरे, उपसरपंच गणेश कऱ्हे आदींसह ग्रामपंचायत सदस्य व ग्रामस्थ उपस्थित होते. 

या वेळी पालकमंत्री बापट म्हणाले, ""पीएमआरडीएच्या हद्दीत पुढील काळात पाणी साठवणूक क्षमता वाढविण्यासाठी तलावांचे खोलीकरण गरजेचे आहे. त्याचाही विचार करण्यात येणार आहे.'' 

ही होणार कामे 
होळकरवाडी येथील दोन किलोमीटर रस्त्याच्या कामकाजासाठी 4 कोटी 63 लाख खर्च येणार आहे. हे काम नऊ महिन्यांच्या कालावधीत पूर्ण केले जाणार आहे. यामध्ये रुंदीकरण, डांबरीकरण, मोऱ्या, गटारीचे काम केले जाणार आहे. तसेच होळकरवाडीपासून पुरंदर तालुक्‍यातील कानिफनाथ मंदिराकडे जाणाऱ्या भाविकांची मोठी सोय होणार आहे. तसेच, प्रस्तावित रस्ता रिंगरोडला जोडणारा असल्याने वाहनांची वर्दळ कमी होण्यास मदत होणार आहे.