चाकण, ता. ८ : चाकण औद्योगिक वसाहतीतील वासुली (ता. खेड) येथे रस्त्यावर वाहने आडवी लावून ड्रोनने चित्रीकरण केल्याप्रकरणी चौघांवर गुन्हा दाखल करण्यात आला आहे. यामुळे वाहतूक कोंडी होऊन इतर वाहनचालकांच्या जीविताला धोका निर्माण झाला होता. याप्रकरणी राम राऊत, आदित्य निखाडे (दोघे रा. भांबोली), साहिल जांभळे (रा. वासुली), प्रणव पाचपुते (रा. वासुली, ता. खेड) यांच्यावर मोटर वाहन कायद्यानुसार सोमवारी (ता. ७) गुन्हा दाखल करण्यात आला.
वासुली हद्दीतील संत तुकाराम चौक ते मिंडेवाडी रस्त्यावर बुधवारी (ता. ३) रात्री सव्वाअकराच्या सुमारास हा प्रकार घडला. आरोपींनी त्यांच्या ताब्यातील फॉर्च्यूनर, स्कॉर्पिओ व इतर दोन मोटारी समांतर चालवून आणि अचानक थांबवून चित्रीकरण केले. याचा व्हिडिओ समाजमाध्यमावर व्हायरल झाल्यानंतर पोलिस हवालदार संपत मुळे यांनी फिर्याद दिली. यानुसार कारवाई करण्यात आल्याची माहिती महाळुंगे पोलिस ठाण्याचे प्रभारी वरिष्ठ निरीक्षक अनिल देवडे यांनी दिली. दरम्यान, पाचपुते बाहेरगावी असल्याने राऊत, निखाडे, जांभळे या तिघांना ताब्यात घेत कायदेशीर प्रक्रिया पूर्ण करून या तिघांनाही समज देऊन सोडून देण्यात आले, अशी माहिती उत्तर महाळुंगेचे वरिष्ठ पोलिस निरीक्षक दिगंबर सूर्यवंशी यांनी दिली.