पिंपरी - प्रवासी वाहन करणाऱ्या चालकाकडून दोन हजार 600 रुपये हप्ता घेणाऱ्या हिंजवडी वाहतूक पोलिसांच्या हस्तकाला लाचलुचपत प्रतिबंधक पुणे विभागाने मंगळवारी (ता. 12) वाकड येथील उड्डाणपुलाखाली हिंजवडी वाहतूक शाखेसमोर रंगेहाथ पकडले केली.

भालचंद्र संदीपान कानडे (वय 38, रा. शिंदे वस्ती, मारूंजी) असे आरोपीचे नाव आहे. लाचलुचपत प्रतिबंधक पुणे विभागाचे सहाय्यक पोलिस आयुक्त सुहास नाडगौडा यांनी दिलेल्या माहितीनुसार, तक्रारदार हा वाकड व हिंजवडी परिसरात प्रवासी वाहतुकीचा व्यवसाय करतो. त्यासाठी महिन्याला एक हजार 300 असे दोन महिन्याचे दोन हजार 600 रुपये हप्ता हिंजवडी वाहतूक विभागातील पोलिसांना देण्याची मागणी कानडे याने त्याच्याकडे केली होती. याबाबत तक्रारदाराने लाचलुचपत प्रतिबंधक विभागाकडे तक्रार केली, त्यानुसार विभागाच्या अधिकारी अनिता हिवरकर यांनी सापळा रचून आरोपीला पैसे घेताना रंगेहाथ पकडले.