सिंहगड रस्ता - माणिक बाग येथील एका मोठ्या गृहप्रकल्पात झाडांची छाटणी करत असताना कामगाराचा विजेच्या तारेस स्पर्श होऊन जागीच मृत्यू झाल्याची घटना घडली.

याबाबत सविस्तर वृत्त असे की, सिंहगड रस्ता परिसरातील माणिक बाग येथील कुदळे पाटील टाऊनशिप येथे झाडे तोडण्याचे काम सुरू होते. यावेळी झाडे तोडणाऱ्या कामगाराचा संपर्क जवळच असलेल्या विद्युत वाहिनीशी आल्याने विजेचा धक्का बसून कामगाराचा जागीच मृत्यू झाला.

अशोक मारुती सोन्नर (वय ३८, रा. शिवनेरी नगर, कोंढवा पुणे ) असे मृत्यू झालेल्या कामगाराचे नाव आहे. घटनास्थळी माहिती मिळताच आनंदनगर येथील अग्निशमन दल तसेच सिंहगड पोलीस उपस्थित झाले. त्या ठिकाणी उच्च दाब विद्युत वाहिनी असल्याने कामगाराचा संपर्क येतातच त्याच्या कपड्याने पेट घेतला आणि त्यातच त्या कामगाराचा अंत झाला. आनंद नगर अग्निशमन दलाचे केंद्र प्रमुख प्रभाकर उमराटकर, केंद्र अधिकारी प्रकाश गोरे, तांडेल संतोष भिलारे, अग्निशमन जवान राकेश बरे, आदिनाथ पवार उपस्थित होते.

पुढील अधिक तपास सिंहगड पोलीस ठाण्याचे वरिष्ठ पोलीस निरीक्षक शैलेश संखे यांच्या मार्गदर्शनाखाली पोलीस निरीक्षक अक्षय पाटील करत आहेत.

ही घटना घडली त्या ठिकाणी विद्युत वाहिन्या दोन इमारतींच्या मधून जाणार्‍या होत्या. या भूमिगत का नव्हत्या?  

विदुयत वाहिनी ज्या भागातून जात आहेत त्या ठिकाणी सुरक्षित यंत्रणा का नाही?

विदूत वाहिनीच्या जवळ पर्यन्त तिथे पत्र्याचे बांधकाम कसे करण्यात आले?

तसेच कामगारांसाठी झाडे तोडतांना सुरक्षा यंत्रणा नव्हती का?

ही प्रश्ने अनुत्तरित आहेत.