वालचंदनगर - सणसर (ता. इंदापूर)  येथे  दगड वाहतुक करणाऱ्या ट्रॅक्टर- ट्रॉलीच्या हेलकाव्याची धडक बसून झालेल्या अपघातामध्ये दवाखान्यामध्ये चाललेल्या दाेघांचा जागीच मृत्यू झाला. या अपघातामध्ये एक जण युवक गंभीर जखमी झाला आहे. या अपघातामध्ये मिराबाई कैलास आष्टेकर (वय ५०), व प्रदीप कुमार फडतरे (रा. दोघे, भवानीनगर) यांचा जागीच मृत्यू झाला. तर ओंकार कैलास आष्टेकर (वय २०) या युवक गंभीर जखमी झाला आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

मिराबाई आष्टेकर या आजारी असल्यामुळे  सोमवार (ता.१५) रोजी पावणेएक वाजण्याच्या सुमारास ओंकार आष्टेकर व प्रदीप फडतरे हे दोघे जण मिराबाई यांना दोघांच्या मध्ये बसवून दुचाकीवरुन सणसरमधील प्राथमिक आरोग्य केंद्रामध्ये सरकारी दवाखान्यामध्ये घेवून चालले होते. सणसर जवळील पाटंबधारे वसाहतीजवळ दगड भरलेले ट्रॅक्टर व  दोन ट्रॉली सणसर बाजूकडे जात असताना ट्रॅक्टर-ट्रॉलीची दुचाकीला धडक बसली. अपघातामध्ये मिराबाई आष्टेकर व प्रदिप फडतरे यांच्या अंगावरुन व डाेक्यावरुन दोन्ही ट्रॉलीची चाके  गेल्याने दोघांचा जागीच मृत्यू झाल्याची घटना घडली. या अपघातामध्ये ओंकार आष्टेकर ही गंभीर जखमी झाला असून त्याच्यावर खासगी रुग्णालयमध्ये उपचार सुरु आहेत. याप्रकरणी पोलिसांनी टॅक्ट्रर चालकावर गुन्हा दाखल केला असून तपास वालचंदनगर पाेलिस करीत आहेत.

Edited By - Prashant Patil