पुणे : शहराच्या मध्यवर्ती भागात पोलिस हवालदाराच्या खुनाची घटना ताजी असतानाच बुधवारी रात्री धायरी येथे टोळक्‍याने पुर्व वैमनस्यातुन दोन तरुणांवर कोयत्याने वार केले. या घटनेत एका तरुणाचा जागीच मृत्यू झाला, तर दुसरा तरुण गंभीर जखमी झाला आहे. ही घटना बुधवारी रात्री साडे आठ वाजण्याच्या सुमारास धायरी येथील रायकरमळ्यात रात्री साडे आठ वाजण्याच्या सुमारस घडली. याप्रकरणी सिंहगड पोलिसांनी एकास अटक केली आहे. अनिकेत उर्फ मोन्या अंकुश पोळेकर (वय 19, रा. रायकरमळा) असे अटक केलेल्या संशयित आरोपीचे नाव आहे. शाम हरिश्‍चंद्र सोनटक्के (वय 20, रा. जाधवनगर, रायकर मळा, धायरी) असे खुन झालेल्या तरुणाचे नाव आहे. तर फिर्यादी योगेश व्यंकटेश चव्हाण (वय. 19, रा.धायरीगाव) हा गंभीर जखमी आहे. या घटनेत पोळेकर याच्यासह पाच जणांवर खुनाचा गुन्हा दाखल करण्यात आला आहे. त्यामध्ये चार अल्पवयीन मुलांचा समावेश आहे.

पोलिसांनी दिलेल्या माहितीनुसार, शाम सोनटक्के, योगेश चव्हाण व आरोपी अनिकेत पोळेकर हे सर्वजण एकाच परिसरात राहण्यास असल्याने त्यांची एकमेकांशी ओळख होती. दरम्यान, पोळेकर व त्याच्या साथीदारांची आणि शाम, योगेश यांची काही दिवसांपुर्वी भांडणे झाली होती. दरम्यान बुधवारी रात्री आठ वाजण्याच्या सुमारास फिर्यादी योगेश हा सोनटक्के व अन्य मित्रांसोबत दारू पिण्यासाठी रायकरमळा येथील एका कंपनीच्या मागील बाजूच्या मोकळ्या जागेत जाणार होते.

त्यावेळी आरोपी पोळेकर हा त्याच्या साथीदारासोबत तेथे आला. तेव्हा, त्यांच्यात पुन्हा भांडणे झाली. त्यावेळी पोळेकर फिर्यादी व शामला शिवीगाळ करीत मारहाण करण्यास सुरूवात केली. त्यानंतर आरोपींनी त्यांच्यासमवेत आणलेल्या तलवारी व कोयत्याने दोघांवर वार केले. सोनटक्के याचे डोके, गळा व तोंडावर वार केल्याने तो गंभीर जखमी झाला. तसेच योगेश हा देखील जखमी झाला. या घटनेची माहिती मिळताच पोलिसांनी दोघांना रुग्णालयात दाखल केले. त्यानंतर पोलिसांनी आरोपींचा शोध सुरू केला. पोळेकर यास रात्री उशीरा अटक करून गुरूवारी न्यायालयात हजर केले. न्यायालयाने त्यास 10 एप्रिलपर्यंत पोलिस कोठडी सुनावली. या प्रकरणाचा तपास सिंहगड पोलिस करीत आहेत.