पिंपरी - दुचाकीच्या सीएनजी किटसाठी अर्थसाह्य देण्याचे बॅंकांनी नाकारल्यामुळे ही योजना फसली आहे. शहरामध्ये १६ लाख दुचाकी असून आतापर्यंत केवळ १५० दुचाकींना हे किट बसविण्यात आले आहे. 

पर्यावरणाचे संवर्धन आणि दुचाकीमुळे होणारे प्रदूषण कमी करण्यासाठी महाराष्ट्र नॅचरल गॅस लिमिटेडने (एमएनजीएल) सहा महिन्यांपूर्वी दुचाकी वाहनांसाठी सीएनजी कीट बसवण्याची योजना सुरू केली होती. पंधरा हजार रुपयांचे हे किट बॅंकेच्या अर्थसाह्यातून उपलब्ध करून देण्याचा उपक्रम होता. पहिल्या पाच हजार गाड्यांना कीटसाठी देण्यात येणाऱ्या कर्जावरील व्याज एमएनजीएलकडून देण्यात येणार होते. मात्र, संबंधित बॅंकेने अर्थसाह्याची रक्‍कम किरकोळ असल्यामुळे या योजनेतून काढता पाय घेतला. 

दरम्यान, एमएनजीएलने आतापर्यंत यासाठी अनेक बॅंकांबरोबर चर्चा केली. मात्र, कोणीही त्यासाठी पुढाकार घेत नसल्याचे एमएनजीएलचे व्यवस्थापकीय संचालक अरविंद तांबेकर यांनी ‘सकाळ’ला सांगितले. 

सीएनजी किटला मोठी मागणी
पिंपरी-चिंचवड परिसरातील भोसरी, चिंचवड औद्योगिक पट्ट्यात काम करणाऱ्या अनेकांनी आपल्या दुचाकीला हे सीएनजी किट बसवायचे आहे. मात्र, त्यांना अर्थ साहाय्य मिळत नसल्यामुळे ते शक्‍य होत नाही.

फायदेशीर किट
दुचाकीसाठी तयार करण्यात आलेले कीट पर्यावरणपूरक असे आहे. यामुळे हायड्रोकार्बनचे प्रमाण ७५ टक्‍क्‍यांनी तर कार्बन डायऑक्‍साईडचे प्रमाण २० टक्‍क्‍यांनी कमी होणार आहे. एक किलो गॅसमध्ये दुचाकी ६५ ते ७० किलोमीटर धावणार आहे. या कीटमध्ये दोन सिलिंडर बसवण्यात आले असून त्यामध्ये दोन किलो सीएनजी बसतो. 

पेट्रोलपेक्षा सीएनजी स्वस्त
गेल्या काही दिवसांपासून पेट्रोलचे दर रोज वाढत आहेत. सध्या पेट्रोलचा प्रतिलिटरचा दर ९० रुपयापर्यंत जाऊन पोचला आहे. एक लिटर पेट्रोलमध्ये दुचाकी ३५ ते ४० किलोमीटर धावते. सीएनजीचा एका किलोचा दर ५२ रुपये आहे. यामध्ये दुचाकी ७० किलोमीटरपर्यंत चालते. पेट्रोलच्या तुलनेत हे खूपच स्वस्त आहे.

शहरात सीएनजीवर धावणारी दुचाकी वाहने - १५०
शहरातील सीएनजी पंपांची संख्या - २२