पिंपरी : रहदारीच्या रस्त्यावर धोकादायकरित्या उभ्या केलेल्या टेम्पोला धडकून दुचाकीस्वाराचा मृत्यू झाला. ही घटना मोशी येथे घडली. सचिन दत्ता बाशिंगे असे या अपघातात मृत्यू झालेल्या दुचाकीस्वाराचे नाव आहे. याप्रकरणी संजय बाहुलाल गडकररा (रा. संजय गांधीनगर, मोशी) या टेम्पोचालकावर गुन्हा दाखल झाला आहे.

सोमवारी (ता. 16) दुपारी दीडच्या सुमारास आरोपीने त्याचा टेम्पो (एमएच 14 सीपी-4562) पुणे-नाशिक महामार्गावरील मोशी येथील गोल्डन पाल्म सोसायटीसमोर धोकादायकरित्या उभा केला होता. यावेळी इंडिकेटरही लावलेले नव्हते. दरम्यान, सचिन बाशिंगे हे मोशीहून भोसरीच्या दिशेने (एमएच 14, एचएन 4405) या क्रमांकाच्या दुचाकीवरून जात असताना रस्त्यात धोकादायकरित्या उभ्या असलेल्या टेम्पोला पाठीमागून त्यांची दुचाकी धडकली. यामध्ये गंभीर जखमी झाल्याने त्यांचा मृत्यू झाला.

बाशिंगे यांच्या मृत्यूस कारणीभूत ठरल्याप्रकरणी टेम्पोचालकावर गुन्हा दाखल झाला आहे. एमआयडीसी भोसरी पोलिस अधिक तपास करीत आहेत.