उंड्री - जागरण झाले..., गोंधळ झाला..., भजन झाले... पोतराजाने अंगावर कोरडेही ओढले... गाववाल्यांसह आमदार, माजी मंत्र्यांनीही भेट देऊन पाठिंबा दर्शविला, तरीसुद्धा झोपेचं सोंग घेतलेले महापालिका प्रशासन आता नेमके काय केल्यानंतर? आमच्या आंदोलनाची दखल घेऊन या जाचक करातून मुक्तता करेल? अशी विचारणा उंड्री गाव कृती संघर्ष समितीने केली आहे.

महापालिका प्रशासनाविरोधात आज सलग आठव्या दिवशीही आंदोलन सुरू असून, दररोज परिसरातील नागरिकांकडून पाठिंबा व्यक्त केला जात आहे. मात्र, पालिका प्रशासन अद्याप उंड्रीसह समाविष्ट गावांतील नागरिकांच्या जाचक करवाढीविषयी निद्रित का आहे, असा सवाल सामान्यजणांकडून उपस्थित केला जात आहे.

दरम्यान, राष्ट्रवादी काँग्रेस पार्टीच्या खासदार सुप्रिया सुळे यांनी उंड्रीतील उपोषणकर्त्यांची भेट घेऊन विचारपूस केली. यावेळी पालिका आयुक्त विक्रम कुमार यांच्याशी उपोषणकर्त्यांविषयी विचारणा केली. शांततेत चर्चा करून मार्ग काढला पाहिजे. सर्व गावांना न्याय मिळण्यासाठी प्रयत्न केला जाईल. उद्या (बुधवार, दि. २८ डिसेंबर, २०२२) पालिकेतील अधिकारी उपोषणकर्त्यांची भेट घेऊन चर्चा करतील. तसेच, मुख्यमंत्री आणि उपमुख्यमंत्र्यांशी चर्चा करून न्याय देण्यासाठी प्रयत्न केला जाईल, अशी ग्वाही उपोषणकर्त्यांना त्यांनी दिली.