पुणे - कोरोनाच्या प्रादुर्भावामुळे आर्थिक संकटात सापडलेल्या कॅबचालकांसाठी ‘उबर इंडिया’ने मदतीचा हात पुढे केला आहे. कुटुंबाच्या महिन्याच्या गरजा भागतील एवढे पैसे कॅबचालकांच्या बॅंक खात्यात पाठवण्यास गुरुवारपासून  सुरवात केली. 

बातम्या ऐकण्यासाठी डाऊनलोड करा ई-सकाळचे ऍप

कोरोनाच्या पार्श्वभूमीवर ‘उबर इंडिया’ने २५ कोटी रुपयांचा ‘उबर केअर ड्रायव्हर फंड’ उभारला आहे. त्यातून उबरने देशातील ५५ शहरांमधील कॅबचालकांना विशिष्ट रक्कम देण्यास सुरुवात केली आहे. मात्र, देशातील एकूण किती कॅबचालक आणि त्यांना किती रक्कम देणार, हे ‘उबर’ने जाहीर करण्यास नकार दिला आहे. याविषयी ‘उबर इंडिया’चे अध्यक्ष प्रदीप परमेश्वरन ‘सकाळ’शी बोलताना म्हणाले, ‘सगळेच कॅबचालक सध्या आर्थिक अडचणीत सापडले आहेत.

या वेळी सामाजिक जबाबदारी म्हणून त्यांना मदत केली पाहिजे, अशी कंपनीची भूमिका आहे. त्यासाठीच ड्रायव्हर फंड उभारण्यात आला आहे. एका कॅबचालकाच्या चार आठवड्यांच्या किमान गरजा भागतील, एवढे पैसे त्याच्या बॅंक खात्यात वर्ग करण्यास कालपासून आम्ही सुरुवात केली आहे. हे पैसे चालकाला परत करावे लागणार नाहीत, कंपनीने केलेली मदत आहे, असेही त्यांनी सांगितले.  मुंबई, ठाणे, पुणे आणि नागपूरमध्ये उबरची सेवा सुरू आहे. या चार शहरांमध्ये कंपनीकडून कॅबचालकांच्या बॅंक खात्यात हा निधी जमा करण्यात येत आहे, असेही त्यांनी स्पष्ट केले.