सातारा, ता. ४ : सातारा लोकसभेच्या निवडणुकीसाठी आज झालेल्या मतमोजणीत महायुतीचे भाजपचे उमेदवार उदयनराजे भोसले यांनी महाविकास आघाडीचे राष्ट्रवादी शरदचंद्र पवार पक्षाचे उमेदवार शशिकांत शिंदे यांचा तब्बल ३२ हजार ७७१ मतांनी पराभव केला. सुरुवातीला शशिकांत शिंदेंनी १९ हजारांचे मताधिक्य घेऊन आघाडी घेतली आणि विजयी जल्लोषही केला; पण १४ व्या फेरीनंतर बाजी पलटली आणि उदयनराजेंचे मताधिक्य वाढत जाऊन त्यांनी विजयश्री खेचून आणली. शशिकांत शिंदेंना पराभवाचा धक्का दिला. शिंदेंना वाई, कऱ्हाड उत्तर आणि पाटण मतदारसंघांनी अल्पसे मताधिक्य दिले, तर सातारा, कऱ्हाड दक्षिण व कोरेगाव मतदारसंघांनी उदयनराजेंचा विजय सुकर केला.
अटीतटीने आणि चुरशीने झालेल्या या निवडणुकीत तुतारीच बाजी मारेल, अशी चर्चा रंगली होती; पण अगदी एक्झिट पोलचे अंदाजही या निकालाने फोल ठरवले. उदयनराजेंची उमेदवारी जाहीर करण्यात भाजपने उशिरा केला होता, तर श्रीनिवास पाटील यांनी प्रकृतीच्या कारणांनी माघार घेतल्यामुळे उमेदवार कोण याचीच चर्चा या मतदारसंघात होती. अर्ज भरण्याच्या तोंडावर उदयनराजे व शशिकांत शिंदे यांची उमेदवारी जाहीर झाली. सुरुवातीच्या टप्प्यात महाविकास आघाडी प्रचारात आघाडीवर होती. त्यामुळे शशिकांत शिंदे यांना चांगले वातावरण होते; परंतु अखेरच्या टप्प्यात भाजप व उदयनराजे यांनी अनेक डावपेच टाकले. कऱ्हाडमध्ये पंतप्रधान नरेंद्र मोदींची, तर वाईत अजित पवारांची सभा झाल्यानंतर वातावरण फिरायला सुरुवात झाली. त्याचेच प्रतिबिंब आजच्या निकालात दिसून आले.