पुणे - महाराष्ट्रातील उद्धव ठाकरे यांचे अमंगल सरकार कायम स्वरूपी गेले आहे. आता स्वयं एकनाथ आणि देवेंद्र हे आता महाराष्ट्रात मंगलमय जीवन आणतील. तसेच ठाकरे यांचा उजवा हात जेलमध्ये गेला आहे. डावा हातही जेलमध्ये जाईल. उद्धव ठाकरे तुमच्या मुलाला सांभाळा अशा शब्दात भाजपचे नेते किरिट सोमय्या यांनी टीका केली.

किरिट सोमय्या यांनी पुण्यातील मानाच्या गणपतीसह इतर मंडळांच्या गणपतीचे दर्शन घेतले. त्यावेळी त्यांनी माध्यमांशी संवाद साधला. भाजपचे शहराध्यक्ष जगदीश मुळीक यावेळी उपस्थित होते.

मानाचा पहिला कसबा गणपतीचे दर्शन घेतले. गेले अडीच वर्षाच महाराष्ट्र मागे गेला त्याला पुन्हा विकासाच्या पथावर न्यावे अशी प्रार्थना केली. ज्या दिवशी ठाकरे सरकार गेले त्या दिवशी महाराष्ट्रावरील अमंगल संपले आता स्वयं एकनाथ व देवेंद्र हे दोघे महाराष्ट्राचे मंगल करतील.

आज दुपारी मुंबई महापालिकेने आदित्य ठाकरे, अस्लम भाई यांनी केलेल्या १ हजार कोटीच्या भ्रष्टाचाराची चौकशी करण्याची घोषणा केली आहे. पर्यावरण मंत्रालयाने एक हजार कोटीचा घोटाळा केला आहे. मड आयलंड येथील रिसॉर्टला २१ फेब्रुवारी २०२१ ला पर्यावरण विभागाने तात्पुरती परवानगी दिली व त्यानंतर महापालिकेतील सत्ताधाऱ्यांनी ही परवानी २०२५ पर्यंत वाढवून दिली. मी याचा पुरावा दिला आहे. व पुरावा दिल्यानंतर काय होते हे संजय राऊत यांना विचारा, असा टोला सोमय्या यांनी मारला.