ठाकरेंचे आंदोलन हे नाकर्तेपणाचे : फडणवीस
छत्रपती संभाजीनगर, ता. १७ : ‘‘जनतेने उद्धव ठाकरेंनाही संधी दिली होती; परंतु, त्यांनी काहीच केले नाही. त्यामुळे आज ते करत असलेले ‘तुमसे ना हो पायेगा’ हे आंदोलन नाकर्तेपणाचेच आहे’, असा घणाघात मुख्यमंत्री देवेंद्र फडणवीस यांनी उद्धव ठाकरे यांच्यावर गुरुवारी केला.
ठाकरे यांच्या नेतृत्वाखाली गुरुवारी विभागीय आयुक्तालयावर राज्य सरकारविरोधात ‘तुमसे ना हो पायेगा’ हे जनआंदोलन करण्यात आले. त्याबाबत विचारले असता, फडणवीस यांनी ठाकरेंचा समाचार घेतला. डीएमआयसी कोणी केली? डीएमआयसीमध्ये उद्योग कोणी आणले? आज छत्रपती संभाजीनगर आणि जालना हे देशातील ईव्हीचे मॅग्नेट तयार झाले. हे कोणामुळे झाले? तुम्ही केवळ विरोध करत राहा, हे नाकर्त्यांचेच आंदोलन आहे’, असेही फडणवीस म्हणाले. यूपीआय व्यवहारांवर आकारल्या जाणाऱ्या शुल्काबाबत राहुल गांधी यांनी ‘पंतप्रधान नरेंद्र मोदी यांनी पाठीचा कणा ताठ ठेवावा’, असे वक्तव्य केले होते. त्यावर विचारले असता फडणवीस म्हणाले, ‘पहिल्यांदा राहुल गांधींना स्वतःच्या पाठीचा कणा आहे का? हे बघावे लागेल; कारण ते सकाळी एक बोलतात आणि संध्याकाळी एक बोलतात. जे लिहून दिले जाते तितकेच ते वाचतात. त्यामुळे त्यांना या विषयाची कोणतीही माहिती नसते.’