वाचक लिहीतात

आयुक्तांचे अभिनंदन आणि अपेक्षा
‘अनधिकृत बांधकामांसह नळजोडांवर कारवाईचा इशारा'' ही बातमी वाचली. शहरात स्वच्छता आणि शिस्त राखण्यासाठी महानगरपालिकेने आग्रही भूमिका घेतली आहे असे बातमीत म्हटले आहे. अनधिकृत जाहिराती, अतिक्रमणे, बेकायदेशीर नळ जोडण्या तसेच परवानगीशिवाय सुरू असलेल्या बांधकामावर कठोर कारवाईचा इशारा आयुक्त डॉ. विजय सूर्यवंशी यांनी दिला आहे. तसेच पादचाऱ्यांना मोकळे आणि सुरक्षित मार्ग, अतिक्रमण मुक्त रस्ते याबाबत तत्काळ कारवाई करा असे आदेशही आयुक्त यांनी दिले आहेत. याबद्दल आयुक्तांचे अभिनंदन! आयुक्तांनी गेल्या महिना-दीड महिन्यांत अनेक वेळा विविध बैठकांत आदेश दिलेले आहेत. याबाबत ‘सकाळ’मध्ये यापूर्वीच आयुक्तांची बातमी प्रसिद्ध झालेली आहे. परंतु प्रत्यक्षात काय? महापालिकेच्या सर्वच भागांमध्ये वरील सर्व समस्या नागरिकांना रोज भेडसावत आहेत. महानगरपालिकेचे अधिकारी गोरगरीब लोकांना लक्ष करतात, परंतु राजकीय,दंडेलशाही करणाऱ्यांकडे दुर्लक्ष करतात. घरटी तसेच विविध व्यावसायिकांकडे किती नळजोड आहेत याचे कधीही अचानक सर्वेक्षण झालेले नाही. त्यामुळे पाणी चोरी मोठ्या प्रमाणावर होत आहे. आयुक्तांनी स्वतः फक्त आदेश न देता वस्तुस्थिती व क्षेत्रावर नेमके काय काम चालू आहे हे प्रत्यक्ष पाहणे आवश्यक आहे. त्याशिवाय योग्य बदल दिसणार नाही.
- सुरेश लुनावत, किवळे
-----