पुणे : मामा आणि भाच्यामधील नातेसंबंधाबाबतच्या अनेक गोष्टी, घटना आपण ऐकतो. बहुतांशवेळी त्यातून या दोघांमधील प्रेम व्यक्त झाल्याचेच दिसून येते. मात्र, येरवड्यात घडलेल्या एका घटनेत मामा अवघ्या 50 रुपयांसाठी आपल्या भाच्याच्या जीवावर उठल्याचे दिसून आले. भाच्याने मामाला दारू पिण्यासाठी पन्नास रुपये न दिल्याच्या रागातून मामाने आपल्या भाच्याच्या गळ्यावर चाकूने वार केल्याचा धक्कादायक प्रकार शनिवारी (ता.31) येरवड्यात घडला. या घटनेत गंभीर जखमी झालेला भाचा रुग्णालयात उपचार घेत आहे. 

- संजय राऊत हे जगभरातील १८२ देशांचे प्रमुख; चंद्रकांत पाटील यांनी लगावला टोला

येरवड्यातील भाजी मार्केट परिसरात राहणाऱ्या 38 वर्षीय शांताराम धोंडीबा पवार याचा त्याच वस्तीत राहणारा राजू भारत डोंगरे (वय 33) हा सख्खा भाचा आहे. ते दोघेही येरवड्यामध्येच राहतात. राजू डोंगरे हा मदर तेरेसा आश्रमामध्ये सुरक्षा रक्षक आहे. तर पवार हा बांधकाम प्रकल्पावर सेंट्रींगची कामे करतो. पवार यास दारुचे व्यसन आहे. दरम्यान, शनिवारी रात्री पवार हा त्याचा भाचा राजूच्या घरी गेला. त्याने तेथे जाऊन राजूकडे दारू पिण्यासाठी 50 रुपयांची मागणी केली. परंतु राजूने त्यास स्पष्टपणे नकार दिला. त्यामुळे चिडलेल्या मामाने राजूला शिवीगाळ आणि मारहाण केली. राजूच्या पत्नीने दोघांमधील भांडणे सोडविण्याचा प्रयत्न केला. मात्र पवारने तिलाही शिवीगाळ केली. यानंतर पवारने त्याच्या घरात शिरुन भाजी चिरण्यासाठी वापरण्यात येणारा चाकू बाहेर आणला. त्याच चाकूने राजूच्या गळ्यावर आणि पोटावर सपासप वार केले. 

- नवीन कामगार कायद्यास राष्ट्रवादी कामगार सेलचा विरोध​

या घटनेमध्ये राजू गंभीर जखमी झाला. त्यामुळे घाबरुन पवारने तेथून पळ काढला. दरम्यान राजूचे कुटुंबीय आणि स्थानिक नागरिकांनी राजूला उपचारांसाठी तत्काळ खासगी रुग्णालयामध्ये दाखल केले. या घटनेची माहिती काही वेळातच येरवडा परिसरात पोचल्याने चांगलीच खळबळ उडाली. या प्रकरणाचा तपास पोलिस उपनिरीक्षक समीर करपे करीत आहेत.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)