उंड्री : हांडेवाडी रोडवरील मगर पेट्रोल पंप ते चिंतामणीनगर दरम्यान ड्रेनेजलाईनचे काम सुरू असून, विरुद्ध दिशेने येणाऱ्या वाहनांमुळे वाहतूककोंडी आणि ध्वनी व वायूप्रदूषणाने स्थानिकांसह वाहनचालकांची घुसमट होत आहे. पालिका प्रशासनाने ड्रेनेज लाईनचे काम तातडीने करून रस्त्याचे डांबरीकरण करावे, असे मागणी खंडेराव जगताप यांनी केली आहे.

अमित घुले म्हणाले की, वाहतूक पोलिसांनी ड्रेनेज लाईनचे काम सुरू असल्यामुळे मोठ्या वाहनांना या रस्त्याने परवानगी देऊ नये, तसेच विरुद्ध दिशेने येणाऱ्या बेशिस्त वाहनचालकांवर कडक कारवाई केली पाहिजे. पालिका प्रशासनाने करावी, तसेच ठेकेदाराने रेल्वे फाटकाच्या ठिकाणी ड्रेनेजचे काम सुरू असून, पर्यायी मार्गाचे नामफलक लावावेत.

पालिका प्रशासनाने हांडेवाडी रोड आणि महंमदवाडी रस्त्यावरील खड्ड्यांची तातडीने दुरुस्ती करावी, असे त्यांनी सांगितले.

महंमदवाडीत खड्डे दुरुस्तीदरम्यान वाहतूककोंडी

महंमदवाडीतील रस्त्यांची खड्डे दुरुस्तीचे काम शनिवारी (दि. २३ ऑक्टोबर) दुपारी ठेकेदाराने सुरू केले. मात्र, वाहतूक वळविण्यासंबंधी किंवा पर्यायी व्यवस्था, तसेच वाहतूक सुरळीत करण्यासाठी कोणतेही नियोजन केले नाही, त्यामुळे प्रचंड वाहतूककोंडी झाली होती. रस्त्यामध्ये खडीमिश्रीत डांबर टाकून खड्डे बुजवित असताना त्यावर रोलर फिरविला जात होता. अरुंद रस्ता असल्यामुळे वाहने पुढे-मागे जाऊ शकत नव्हती, अशी अवस्था झाल्याने दोन्ही बाजूला वाहनांच्या दूरपर्यंत रांगा लागल्याने वाहनचालकांना मनस्ताप सहन करावा लागला.