पुणे : सावित्रीबाई फुले पुणे विद्यापीठाने दोन विद्यार्थ्यांना नियमबाह्य पद्धतीने पीएचडीला प्रवेश दिला असून, गैरप्रकार रोखण्यासाठी संबंधीत प्रकरणाची चौकशी करावी, अशी मागणी विद्यापीठाचे अधिसभा सदस्य विवेक बुचडे यांनी केली आहे.

नवी पेठेतील श्रमिक पत्रकार संघात आयोजित पत्रकार परिषदेत त्यांनी विद्यापीठ प्रशासनावर आरोप केले. ते म्हणाले,‘‘पीएचडी प्रवेशासाठी होणाऱ्या पेट परीक्षा देण्यापासून दोन विद्यार्थ्यांना नियमबाह्य पद्धतीने सूट दिली आहे. या दोन विद्यार्थ्यांमध्ये एक विद्यापीठाचे अधिकारी आहे, तर एक नामवंत कॉलेजमधील वरिष्ठ लिपीक आहे. त्यामुळे पुणे विद्यापीठ प्रशासन चौकशी करण्यासाठी टाळाटाळ करीत आहे.’’ पेट परीक्षेतून सूट मिळालेल्या दोन विद्यार्थ्यांचे संशोधन केंद्र आणि मार्गदर्शकही एकच आहे. या दोघांनाही कोणत्या आधारावर पीएचडीसाठी प्रवेश देण्यात आला, याची चौकशी होण्याची आवश्यकता आहे. संशोधन क्षेत्रात असे गैरप्रकार योग्य नसल्याचे बुचडे यांनी सांगितले.

विवेक बुचडेंचा दावा..

• पदव्युत्तर पदवीनंतर सरकारी किंवा खासगी क्षेत्रात वरिष्ठ पदावर सलग दहा वर्षे कामाचा अनुभव असणाऱ्यांना पेट परीक्षेपासून सूट देण्यात येत होती

• २०१४ मध्ये अस्तित्वात आलेल्या नियमानुसार विद्यापीठामध्ये २०१५-१६ या शैक्षणिक वर्षात ८० विद्यार्थ्यांनी पीएचडीसाठी प्रवेश घेतला होता

• यामध्ये २२ विद्यार्थ्यांच्या शैक्षणिक कागदपत्रांमध्ये त्रुटी निघाल्या. त्यात २० विद्यार्थ्यांनी कागदपत्रांद्वारे त्रुटींची पूर्तता केली

• मात्र, दोन विद्यार्थ्यांना पेट परीक्षा देण्यापासून नियमबाह्य पद्धतीने सूट दिल्याचे समोर आले

• प्रकरणाच्या तपासासाठी व्ही.बी. गायकवाड यांच्या अध्यक्षतेखाली एक समिती स्ठापन करण्यात आल्याचे, मला सांगण्यात आले

• मात्र, समितीचे अधिकृत पत्र दिले नाही.

पीएचडीच्या अशा प्रवेशा संबंधी नेमण्यात आलेल्या समितीचा अहवाल आला असून, संबंधित प्रवेश रीतसर करण्यात आले आहेत. यासंबंधी जी तांत्रिक अडचण होती ती दूर करण्यात आली आहे.

- डॉ. एन.एस.उमराणी, प्र-कुलगुरू, सावित्रीबाई फुले पुणे विद्यापीठ