पिंपरी - शिकवणी व महाविद्यालयात ये-जा करण्यासाठी अनेक अल्पवयीन मुले सर्रासपणे दुचाकींचा बेकायदा वापर करीत आहेत. त्याकडे वाहतूक पोलिसांनी दुर्लक्ष केले असून, ठोस कारवाईअभावी दिवसेंदिवस या प्रकारांत वाढ होत आहे.

शहरात विविध सुमारे ७० ते ७५ कनिष्ठ महाविद्यालये आहेत. या महाविद्यालयांमध्ये सुमारे एक लाखांहून अधिक विद्यार्थी शिक्षण घेत आहेत. अकरावीत प्रवेश घेतल्यावर महाविद्यालयात येण्यासाठी अनेक मुले ही दुचाकी व मोटारींचा वापर करतात. 

चुकीच्या पद्धतीने दुचाकी चालविल्याने अनेकदा त्यांना अपघाताला सामोरे जावे लागते. मात्र, याबाबत उप-प्रादेशिक परिवहन कार्यालय व वाहतूक पोलिसांकडून संबंधितांविरुद्ध कोणतीही ठोस कारवाई होत नाही.

असा आहे कायदा
मोटारवाहन कायद्यानुसार ज्या मुलाचे वय अठरापेक्षा कमी असेल, त्याला केवळ ५० सीसी क्षमतेपेक्षा कमी क्षमतेची दुचाकी चालविण्याचा परवाना देण्यात येतो. त्यासाठी संबंधित मुलाला व मुलीला त्यांच्या पालकांची लेखी परवानगी आणणे आवश्‍यक असते.

महाविद्यालयांची भूमिका
महाविद्यालये अल्पवयीन मुलांची जबाबदारी घेण्यास नकार देत असून, तशा आशयाचे प्रतिज्ञापत्र मुलांच्या पालकांकडून भरून घेत आहेत. मुलासंदर्भात काही दुर्घटना घडल्यास पालक म्हणून आम्ही महाविद्यालयावर कोणत्याही प्रकारचा दावा करणार नाही. तसेच, अशा घटनेत वाहनाचे काही नुकसान झाल्यास त्याला महाविद्यालय जबाबदार राहणार नाही. या सर्वांसाठी पालक म्हणून आमची जबाबदारी राहील, अशा आशयाचे प्रतिज्ञापत्र दिले जात आहे.