पुणे : अनेक वर्षे कागदावर राहिलेल्या ‘लोकनेते गोपीनाथराव मुंडे ऊसतोड कामगार कल्याण महामंडळा’ला अखेर मूर्त स्वरूप प्राप्त झाले आहे. मुख्यमंत्री उद्धव ठाकरे, उपमुख्यमंत्री अजित पवार यांच्या हस्ते रविवारी (ता. ३) हे महामंडळ कार्यान्वित करून पुण्यातील राज्यस्तरीय कार्यालयाचे उद्घाटन करण्यात येणार आहे.

येथील येरवडा परिसरातील सामाजिक न्याय भवनाच्या आवारात हे कार्यालय उभारले आहे. रविवारी सायंकाळी सहा वाजता लोकार्पण सोहळा सामाजिक न्याय भवन, येरवडा येथे मुख्यमंत्री ठाकरे यांच्या हस्ते पार पडणार आहे. या कार्यक्रमास उपमुख्यमंत्री अजित पवार, गृहमंत्री दिलीप वळसे पाटील, महसूलमंत्री बाळासाहेब थोरात, सहकार मंत्री बाळासाहेब पाटील, सामाजिक न्याय मंत्री धनंजय मुंडे, विधान परिषदेच्या उपाध्यक्षा डॉ. नीलम गोऱ्हे आदी उपस्थित राहणार आहेत. या कार्यक्रमात ऊसतोड कामगारांची नोंदणी केलेल्या कामगारांना प्रातिनिधिक स्वरूपात ओळखपत्र दिले जाणार आहेत. या वेळी ऊसतोड कामगार व वाहतूक संघटनांचे प्रतिनिधी उपस्थित राहणार असल्याची माहिती समाज कल्याण आयुक्त डॉ. प्रशांत नारनवरे यांनी दिली.

‘लोकनेते गोपीनाथराव मुंडे ऊसतोड कामगार कल्याण महामंडळा’ला मूर्त स्वरूप येत आहे. पाडव्याच्या दुसऱ्या दिवसापासून ऊसतोड कामगारांच्या कल्याणाची नवी गुढी राज्य सरकारच्या माध्यमातून उभारत आहोत, याचा आनंद शब्दांत व्यक्त करता येणार नाही. हा दिवस माझ्यासाठी ऐतिहासिक आहे.

- धनंजय मुंडे, सामाजिक न्याय मंत्री