पुणे - कोरोनाशी लढण्यासाठी पुणे महापालिकेकडून विविध उपयोजना सुरू आहेत. कोरोनाचा प्रादुर्भाव झालेल्या देशातून जे नागरिक पुण्यात येतील, अशा नागरिकांना घरी जाऊ न देता तीन दिवस विलगीकरण कक्षात ठेवण्यासाठी स्वतःच्या मालकीच्या इमारतीचा वापर करण्याचा निर्णय महापालिकेने घेतला आहे. पहिल्या टप्प्यात या इमारती ताब्यात घेण्याची कार्यवाही सुरू आहे.

ताज्या बातम्यांसाठी डाऊनलोड करा ई-सकाळचे ऍप

पुण्यात कोरोना विषाणूंचा संसर्ग झालेले पाच नागरिक आढळले आहेत.  त्यांना नायडू रुग्णालयात विलगीकरण कक्षात ठेवण्यात आले आहे. महापालिकेने विविध प्रकाराच्या उपयोजना हाती घेतल्या आहेत. सिटी टास्क फोर्स संदर्भात महापालिका आयुक्त शेखर गायकवाड आणि अतिरिक्त आयुक्त रूबल आग्रवाल यांनी बैठक घेतली. त्यामध्ये त्यांनी या सूचना दिल्या आहेत.

विविध सुविधा देणार 
शहरात महापालिकेच्या मालकीच्या तसेच आरोग्य खात्याच्या ताब्यात असलेल्या अनेक इमारती आहेत. त्या सध्या विनावापर पडून आहेत. अशा मिळकती ताब्यात घेऊन त्या ठिकाणी विलगीकरण कक्ष सुरू करण्यात येणार आहे. परदेशातून आलेल्या नागरिकांना थेट घरी जाऊ न देताना त्यांना किमान चौदा दिवस या इमारतींमध्ये ठेवण्यात येणार आहे. त्यासाठी अशा इमारतीमध्ये सिव्हिल, इलेक्‍ट्रिकलविषयक कामे तातडीने पूर्ण करून घ्यावीत. आवश्‍यक त्या सर्व सुविधा त्या ठिकाणी उपलब्ध करून देण्याच्या सूचना आयुक्तांनी दिल्या आहेत.

कोरोनाचे पाच रुग्ण आढळल्यानंतर महापालिका प्रशासनाने तातडीने टास्क फोर्सची स्थापन करून त्यांची जलदगतीने अंमलबजावणी करण्याच्या सूचना देण्यात आल्या आहेत.
- शेखर गायकवाड, आयुक्त, पुणे महापालिका  

‘विद्यार्थ्यांना मास्कची सक्ती नको’
‘शाळेत येताना मास्क घालण्याची सक्ती विद्यार्थ्यांना करू नये, अशा सूचना शिक्षण आयुक्त विशाल सोळंकी यांनी केली आहे. 

‘कोरोना’बाबत शाळांनी विद्यार्थ्यांचे प्रबोधन करण्याबाबत आयुक्तांनी परिपत्रक प्रसिद्ध केले आहे. शिक्षणाधिकारी आणि शिक्षण निरीक्षकांनी याबाबत जागृती आणि खबरदारी घेण्याच्या सूचना शाळांना द्याव्यात, असे त्यात म्हटले आहे.

शिक्षण आयुक्तांच्या सूचना
    वारंवार हात धुवा, शिंकताना, खोकताना रुमाल, टिश्‍श्‍यू पेपरचा वापरा.
    विद्यार्थी आजारी असेल, तर त्याने शाळेत येण्याचे टाळावे.
    ताप, सर्दी आणि खोकल्याने आजारी असलेल्या व्यक्तीपासून दूर राहावे.

राज्य शिक्षण मंडळ बैठक घेणार 
राज्य शिक्षण मंडळाच्या दहावी आणि बारावीच्या परीक्षा सुरू आहेत. या विद्यार्थ्यांनी कोणती खबरदारी घ्यावी, याबाबत अद्याप कोणत्याही सूचना दिलेल्या नाहीत. मंडळाच्या अध्यक्षा डॉ. शकुंतला काळे म्हणाल्या, ‘‘परीक्षार्थी विद्यार्थ्यांना कोरोनाबाबत कोणती काळजी घ्यावी, यासंबंधी कोणत्याही सूचना अद्याप दिलेल्या नाहीत. मंडळाच्या बैठकीत यावर चर्चा करून निर्णय घेतला जाईल.’’