लोणी काळभोर : कोरोना रुग्णांची वाढती संख्या लक्षात घेऊन येत्या गुरुवारपासून पुढील तीन दिवस लोणी काळभोर (ता. हवेली) ग्रामपंचायत हद्दीतील भाजीपाला बाजार व शनिवार (ता. २०) चा आठवडे बाजार बंद ठेवण्यात येणार असल्याची माहिती सरपंच राजाराम काळभोर यांनी दिली आहे. 

दरम्यान लोणी काळभोर प्रमाणेच उरुळी कांचन परीसरातही कोरोनाचा प्रादुर्भाव मोठ्या प्रमानात वाढू लागला आहे. यामुळे लोणी काळभोर ग्रामपंचायत हद्दीतील भाजीपाला बाजार व शनिवार (ता. २०) चा आठवडे बाजाराप्रमाणेच, उरुळी कांचन परीसरातील भाजीपाला बाजार व आठवडे बाजार काही काळ बंद ठेवयाची मागणी उरुळी कांचन परीसरातील नागरीकांनी केली आहे.

पुर्व हवेलीमधील लोणी काळभोर व उरुळी कांचन या दोन्ही मोठ्या ग्रामपंचयत हद्दीत मागील दहा दिवसांपासून कोरोनाने थैमान घालण्यास सुरुवात केली आहे. मागील दहा दिवसांच्या कालावधीत उरुळी कांचन हद्दीत नव्वदहुन अधिक तर लोणी काळभोर ग्रामपंचायत हद्दीत ११० नागरीकांना कोरोनाची लागण झाल्याचे निदान झालेले आहे. यामुळे वरील दोन्ही ग्रामपंचायतीच्या प्रशासनाच्या तोंडचे पाणी पळाले आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

याबाबत बोलताना लोणी काळभोरच्या उपसरपंच ज्योती काळभोर म्हणाल्या, ''मागील दहा दिवसांच्या काळात लोणी काळभोर ग्रामपंचायतीच्या एक पदाधिकारी, तीन कामगार, प्राथमिक आरोग्य केंद्रातील कर्मचाऱ्यांच्यासह ११० हुन अधिक नागरीक कोरोना पॉझिटीव्ह असल्याचे आढळून आले आहे. ग्रामपंचायत स्तऱावर ग्रामपंचायत प्रशासन कोरोनाला हटवण्यासाठी जमजागृती करत असले तरी, नागरीक मात्र मास्कशि्वाय फिरत असल्याचे दिसून येत आहे. यामुळे ग्रामपंचातीने ग्रामपंचायत हद्दीतील भाजीपाला बाजार व शनिवार (ता. २०) चा आठवडे बाजार बंद ठेवण्याचा निर्णय घेतला आहे. 

याबाबत बोलताना जिल्हा परीषदेच्या लोणी काळभोर येथील प्राथमिक आरोग्य केंद्राचे आरोग्य अधिकारी डॉ. डि. के. जाधव म्हणाले, कोरोना रोगाच्या वाढत्या पार्श्वभूमीवर पूर्व हवेलीतील लोणी काळभोर,  कदमवाकवस्ती, रायवाडी, मांजरी, महादेवनगर, या परिसरात १ मार्च पासून १०३  जणांना कोरोना रोगाची लागण झालेली आहे. ६२२ लोकांची तपासणी करण्यात आली असून त्यापैकी ११० लोकांचा अहवाल पॉझिटिव्ह आला आहे. तर  ५१२ नागरिकांचा अहवाल हा निगेटिव्ह आहे. नागरीक पुरेशी काळजी घेत नसल्यानेच, कोरोना वाढत चालला आहे. 

लोणी काळभोरसह परिसरातील दैनंदिन व्यवहार हे आपल्याला कोरोना होतच नाही यासारखे  सुरू आहेत. नागरिक मास्क विना आपापल्या मस्तीत घराबाहेर पडत आहेत.  कोरोना  रोखण्याची जबाबदारी ग्रामपंचायत प्रशासन, आरोग्य विभाग, महसूल विभाग व पोलीस खाते कोरोनाला प्रतिबंध करण्याबाबतच्या उपयोजनांची चांगली अंमलबजावणी करत आहेत. मात्र नागरिकांना याचे कसल्याही प्रकारचे काहीही घेणे-देणे नसून कोरोनाचे गंभीर्याच राहिले नाही असे वागत आहेत.

पुणे विद्यापीठाचा कोट्यवधींचा निधी राज्य सरकारकडे थकीत; रक्कम ऐकून बसेल धक्का!

ग्रामपंचायत प्रशासनाच्या उपयोजना- कोरोनाचे वाढते रुग्ण लक्षात घेऊन, लोणी काळभोर पोलिसांनी विना मास्क फिरणाऱ्या नागरिकांकडून  दंडाची वसुली सुरु केली आहे. नागरिक दंड भरायला तयार आहेत पण मास्क लावायला तयार नसल्याचे चित्र उरुळी कांचन, लोणी काळभोर व कदमवाकवस्ती या तीनही ग्रामपंचायत हद्दीत दिसून येत आहे. लोणी काळभोर, उरुळी कांचन व कदमवाकवस्ती या तीनही ग्रामपंचायत हद्दीत पोलिसांनी विना मास्क वावरणाऱ्या नागरीकांच्यावर दंडाची कारवाई अधिक कडक करण्याची गरज आहे.

(संपादन : सागर डी. शेलार)