नारायणगाव - पेट्रोल व डिझेल टंचाईमुळे आज नारायणगाव परिसरातील पेट्रोल पंप बंद ठेवण्यात आले. यामुळे वाहनधारक नागरिकांची मोठी गैरसोय झाली. पेट्रोल व डिझेल टंचाईचा फटका शेतकरी व भाजीपाला वाहतूकदार, व्यापारी यांना मोठया प्रमाणात बसला.

नारायणगाव परिसरात येथील महामार्गावर रिलायन्स, हिंदुस्थान, भारत पेट्रोलियमचे तीन पेट्रोल पंप आहेत. सोमवारी मध्यरात्री पासून येथील पंपावर पेट्रोल व डिझेल शिल्लक नसल्याचे फलक लावण्यात आले. आज (ता. २४) दिवसभर पेट्रोल व डिझेलचे पंप बंद होते. नारायणगाव ही मोठी बाजारपेठ आहे. जुन्नर कृषी उत्पन्न बाजार समितीच्या येथील उपबजारात रोज सुमारे तीनशे जड वाहने शेतमाल घेऊन ये जा करत असतात. येथील शेतमाल विक्रीसाठी प्रामुख्याने मुंबई बाजारपेठेत जात असतो. डिझेल व पेट्रोल नसल्यामुळे वाहनचालक शेजारच्या तालुक्यात पेट्रोल व डिझेलचा शोध घेत होते. डिझेल व पेट्रोल टंचाईमुळे आज वाहनचालक हवालदिल झाले होते.

राजश्री बोरकर (संचालिका - शेवंताई पेट्रोलियम) - आमच्याकडे भारत पेट्रोलियमची एजन्सी आहे.आम्हाला मनमाड येथील कंपनीच्या डेपोतुन पेट्रोल व डिझेलचा पुरवठा होतो. भाव कमी झाल्यामुळे पेट्रोल व डिझेल पुरवठ्यावर परिणाम झाला आहे.