चास, ता. १७ ः खेड तालुक्याच्या पश्चिम पट्यातील शंभो महादेवाच्या पायथ्याशी असलेल्या वेताळेश्र्वर महाराजांचा उत्सव उत्साहात साजरा करण्यात आला.
खेडच्या पश्चिम भागात असलेल्या बिबी, गुंडाळवाडी, बुरसेवाडी येथील ग्रामस्थांचे ग्रामदैवत वेताळेश्र्वर महाराजांचा उत्सव समस्त ग्रामस्थांच्या वतीने साजरा करण्यात आला. सकाळी गावचे माजी सरपंच अरुण आण्णा गुंडाळ, शेतकरी सेनेचे लक्ष्मणराव तनपुरे व इंदुमती तनपुरे, सुनील तनपुरे, गुलाबराव मुके, आरती गुंडाळ, अर्जुन तनपुरे, विष्णुपंत गुंडाळ आदींच्या हस्ते अभिषेक करण्यात आला. त्यानंतर भाविकांनी दर्शनासाठी गर्दी केली होती.
उत्सवानिमित्त संगीत भजनाचा कार्यक्रम ग्रामस्थ व यात्रा कमिटीच्या वतीने आयोजित केला होता. या उत्सवानिमित्त राजगुरुनगर नगरपरिषदेचे नगराध्यक्ष मंगेश गुंडाळ, नगरसेविका आशाताई गुंडाळ, सरपंच संगीता तनपुरे, लेखापरीक्षक योगेश तनपुरे, सेवानिवृत्त विशेष लेखा परीक्षक वर्ग १ विजय सावंत यांचा ग्रामस्थांच्या वतीने सत्कार करण्यात आला. रात्री बाई मी लाडाची हा लावण्यांचा कार्यक्रम आयोजित केला होता. वेताळेश्र्वर उत्सवासाठी समस्त ग्रामस्थ बिबी, यात्रा कमिटी तसेच राजगुरुनगर, मुंबई, पुणे येथील ग्रामस्थ उपस्थित होते.