पुणे - सिंबायोसिस आंतरराष्ट्रीय अभिमत विद्यापीठाच्या कुलगुरूपदी डॉ. रामकृष्णन रमण यांची निवड करण्यात आली आहे. शिक्षणतज्ञ, अनुभवी व्यावसायिक असणारे डॉ. रमण यांनी संगणक विज्ञान आणि अभियांत्रिकीमधील पदवी, सिस्टिम्स आणि मार्केटिंगमधील एमबीए, पुणे विद्यापीठातून व्यवस्थापनातील डॉक्टरेट पदवी प्राप्त केली आहे.

डॉ. रमण यांनी कुलगुरू पदावरून निवृत्त झालेल्या डॉ. रजनी गुप्ते यांच्याकडून नुकताच पदभार स्वीकारला. डॉ. रमण यांना औद्योगिक, शैक्षणिक आणि संशोधन क्षेत्रात दोन दशकांहून अधिक काळाचा अनुभव आहे. सिंबायोसिस सेंटर फॉर इन्फॉर्मेशन टेक्नॉलॉजीचे प्राध्यापक आणि संचालक, सिंबायोसिस इन्स्टिट्यूट ऑफ बिझनेस मॅनेजमेंटचे (पुणे) प्राध्यापक आणि संचालक, व्यवस्थापनाचे अधिष्ठाता, स्ट्रॅटेजी अँड डेव्हलपमेंटचे संचालक अशा विविध पदांवर त्यांनी एक दशकाहून अधिक काळ काम केले आहे.

जपान, कॅनडा, युनायटेड किंगडम आणि युनायटेड स्टेट्स या देशांमधील विद्यापीठांसमवेत आंतरराष्ट्रीय सहकार्य वाढवण्यात त्यांनी महत्त्वपूर्ण भूमिका बजावली आहे. माहिती प्रणाली, आयटी स्ट्रॅटेजी, उद्योजकता, एआय, बिग डेटा यांमधील संशोधनामुळे त्यांना आंतरराष्ट्रीय शैक्षणिक क्षेत्रात मान्यता मिळाली आहे.