राष्ट्रवादीचे नेते अजित पवार हे भाजपसोबत गेल्यानंतर राष्ट्रवादीमध्ये फुट पडली. पक्षात दोन गट निर्माण झाले. या सगळ्या घडामोडीनंतर राज्यात पहिल्यांदाच निवडणूक पार पडली आहे. संपुर्ण राज्याचं लक्ष लागून राहिलेल्या बारामतीतील निकाल समोर आले आहेत. राज्याचा राज्यकारभार सोबत चालवत असणाऱ्या अजित पवार गटाची आणि भाजपची ही एकमेकाविरोधात चुरशीची लढत यावेळी दिसून आली. त्यामुळे संपुर्ण राज्याचं लक्ष त्याकडे लागलं होतं.

अजित पवारांचं गाव असलेल्या काटेवाडीमध्ये भाजप की, राष्ट्रवादी कोण बाजी मारणार याकडे सर्वांचे लक्ष लागले होते. काटेवाडी गावात भाजप विरूध्द राष्ट्रवादी अशी चुरशीची लढत पार पडली. यामध्ये राष्ट्रवादीने बाजी मारली आहे. राष्ट्रवादीने आपली एकहाती सत्ता कायम ठेवली आहे. १६ पैकी १४ जागा अजित पवार गटाच्या पॅनलने जिंकल्या आहेत. तर उर्वरीत २ जागा भाजपच्या पॅनलने जिंकल्या आहेत.

अजित पवार यांचं बारामतीत वर्चस्व पाहायला मिळालं. अजित पवार गटाने ३१ पैकी २९ ग्रामपंचायती जिंकल्या आहेत.

काटेवाडीचा गड राष्ट्रवादी काँग्रेसच्या अजित पवार गटाने राखला. अजित पवार गट पुरस्कृत जय भवानी माता पॅनलचा काटेवाडीतून विजय झाला आहे. काटेवाडी हे उपमुख्यमंत्री अजित पवार यांचं गाव आहे. काटेवाडी ग्रामपंचायत निवडणुकीमध्ये अजित पवार गटाच्या पॅनल पुढे भाजपाचा पॅनल उभा ठाकला होता. यामुळे संपुर्ण राज्याचं लक्ष या निवडणुकीकडे लागलं होतं.

बारामती तालुक्यातील 32 ग्रामपंचायत निवडणूक आहेत. यातील एक बिनविरोध झाल्यामुळे ३१ ग्रामपंचायतीसाठी काल मतदान झालं होतं. महायुतीत असूनही अजित पवार गट आणि भाजपने एकमेकांविरोधात पॅनेल उभी केल्याने या निवडणुकीकडे राज्याचे लक्ष होतं. बारामती तालुक्यातील मध्ये २९ ग्रामपंचायती अजित पवार गटाकडे तर २ भाजपकडे गेल्या आहेत.