जुन्नर : येथील श्री विघ्नहर सहकारी कारखान्याच्या कार्यक्षेत्रात आगामी गाळपासाठी मोठ्या प्रमाणावर ऊस उपलब्ध होणार असल्याने येत्या हंगामात सुमारे अकरा लाख मेट्रिक टनाहुन अधिक ऊस गाळपाचे उद्दिष्ठ राहणार असल्याचे अध्यक्ष सत्यशील शेरकर यांनी सांगितले. श्री विघ्नहर साखर कारखान्याच्या २०२२-२३ च्या गाळप हंगामासाठी मील रोलरचे पुजन आज शुक्रवार ता.०८ रोजी सर्व संचालकांच्या उपस्थितीत उत्साहात  संपन्न  झाले यावेळी ते बोलत होते. यावेळी अध्यक्ष शेरकर, उपाध्यक्ष अशोक घोलप, सर्व संचालक, कार्यकारी संचालक भास्कर घुले व सर्व अधिकारी तसेच कर्मचारी उपस्थित होते.

यावेळी शेरकर म्हणाले, आगामी गाळप हंगामासाठी मशिनरी देखभाल व दुरुस्तीची कामे प्रगतीपथावर असून येत्या ऑक्टोबर महिन्यात विघ्नहर कारखाना गाळपासाठी सज्ज होईल. सहवीजनिर्मीती व डिस्टीलरी प्रकल्पांची कामे गतीने सुरु आहेत. यंदा चांगल्या पावसाचा अंदाज व्यक्त केला जात असल्याने शेतकरी वर्गाचा ऊस लागवडीकडे कल आहे. ऊस उत्पादक शेतकर्‍यांना बेणे पुरविण्याची प्रक्रिया सुरु आहे. आडसाली ऊस लागवडीकडे शेतकर्‍यांचा मोठ्या प्रमाणावर कल असल्याचे दिसत आहे. शेतकर्‍यांनी आडसाली ऊसाबरोबर पूर्वहंगामी व सुरु ऊसाची लागवडही मोठ्या प्रमाणात करावी त्यामुळे ऊस तोडणी नियोजन योग्यप्रकारे करता येईल. हिरवळीचे खत म्हणून ताग बियाणाचेही वाटप सुरु असून ऊस उत्पादकांनी अवश्य फायदा घ्यावा, असे आवाहन शेरकर यांनी केले.