पुणे - देशाची पहिली स्वदेशी विमानवाहू युद्ध नौका आयएनएस विक्रांतचे जलावतरण पंतप्रधान नरेंद्र मोदी यांनी शुक्रवारी कोच्चीन येथे केले. याच युद्धनौकेवर मोदींनी छत्रपतींच्या राजमुद्रेची प्रेरणा घेऊन तयार केलेल्या नौदलाच्या नव्या मुद्रेचे आणि ध्वजाचेही अवतरण केले.

महाराष्ट्रासाठी अभिमानाची गोष्ट म्हणजे या युद्ध नौकेचे पहिले कमांडिंग ऑफिसर कमोडोर विद्याधर हारके हे मराठी असून, मुळचे अहमदनगरचे रहिवासी आहेत. भिंगारमध्ये त्यांचा जन्म आणि बालपण गेले. वडिलांच्या निधनानंतर ते पुण्यात गेले आणि तेथेच स्थायिक झाले. आयएनएस विक्रांतची धुरा हाती घेण्याच्या आधी ते ईस्टर्न फ्लीटचे फ्लीट ऑपरेशन्स ऑफिसर होते. इतरही अनेक मोठ्या युद्ध नौकांचे त्यांनी नेतृत्व केले आहे.