पुणे : मराठवाड्यातील जालना जिल्ह्यात पाथरवाला (ता. अंबड) येथे वसंतदादा शुगर इन्स्टिट्यूटच्या वतीने नवीन केंद्र उभारण्यात येत आहे. त्याठिकाणी ७१ कोटी १६ लाख रुपये खर्च करून प्रशासकीय इमारत, प्रयोगशाळा, प्रशिक्षण केंद्र आदी पायाभूत सुविधा उभारण्यात येणार आहेत. या नवीन केंद्राचा लाभ मराठवाडा, खानदेश आणि विदर्भातील साखर कारखाने आणि ऊस उत्पादक शेतकऱ्यांना होणार आहे.

मांजरी येथील वसंतदादा शुगर इन्स्टिट्यूटच्या (व्हीएसआय) सभागृहात मंगळवारी ज्येष्ठ नेते शरद पवार यांच्या अध्यक्षतेखाली बैठक पार पडली. उपमुख्यमंत्री अजित पवार, सहकार मंत्री बाळासाहेब पाटील, गृह मंत्री दिलीप वळसे-पाटील, जलसंपदा मंत्री जयंत पाटील, आरोग्य मंत्री राजेश टोपे, आमदार रोहित पवार, राष्ट्रीय सहकारी साखर संघाचे अध्यक्ष जयप्रकाश दांडेगावकर, माजी खासदार विजयसिंह मोहिते पाटील, साखर आयुक्त शेखर गायकवाड, ‘व्हीएसआय’चे महासंचालक शिवाजीराव देशमुख, विशेष कार्यकारी अधिकारी संभाजी कडू पाटील आदी या वेळी उपस्थित होते.

शेतकऱ्यांपर्यंत निविष्ठा पोचविण्यासाठी प्रयत्न करणार

‘व्हीएसआय’ची सर्व उत्पादने, निविष्ठा शेतकऱ्यांपर्यंत पोचविण्यासाठी विक्री व्यवस्था सक्षम करण्यात येणार आहे. त्यासाठी साखर कारखान्यांचा सहभाग वाढविण्यात येणार आहे. तसेच, शेतकरी गटांचे मेळावे आयोजित करण्यात येणार आहेत. विविध प्रकारच्या उसाच्या जातींची लागवड करण्यात येणार आहे. ‘व्हीएसआय’ची जैविक उत्पादनेही शेतकऱ्यांपर्यंत पोचविण्यासाठी विक्री व्यवस्थेचे सबलीकरण करण्याचा निर्णय बैठकीत घेण्यात आला.