पुणे : जी - २० या जागतिक संमेलनाचे यजमानपद सध्या भारत भूषवीत असून त्याच निमित्ताने महिलांचे आर्थिक सक्षमीकरण आणि लिंगसमानता या महत्त्वाच्या विषयांवर जागरण व्हावे यासाठी ‘डबल्यू-२०’ (वूमन -२०) परिषद आयोजित करण्यात आली आहे.

या परिषदेचे यजमानपद महर्षी कर्वे स्त्री शिक्षण संस्थेकडे आहे. या परिषदेमध्ये जी-२० देशांमधील महिला उद्योजक व सामाजिक क्षेत्रातील महिला नेतृत्वाचा समावेश असेल. अशी माहिती परिषद संयोजिका डॉ. मंजू हुंडेकर आणि संस्थेचे कार्याध्यक्ष रवींद्र देव यांनी पत्रकार परिषदेत दिली.

डॉ. हुंडेकर म्हणाल्या, ‘‘महिला सक्षमीकरणाचा महत्त्वपूर्ण विषय जी-२० च्या पटलावर केंद्रस्थानी यावा, हे डब्ल्यू २० परिषदेचे मुख्य उद्दिष्ट आहे. भारतामधील डब्ल्यू २० समूहामध्ये शैक्षणिक क्षेत्रातील प्रतिनिधी म्हणून एस.एन.डी.टी महिला विद्यापीठाचा समावेश झालेला असून या विद्यापीठाने महिलांसाठीच्या या परिषदेच्या आयोजनामध्ये महर्षी कर्वे स्त्री शिक्षण संस्थेची निवड केली आहे.

ही परिषद ७ ते ८ एप्रिल या कालावधीत संस्थेच्या ‘स्कूल ऑफ फॅशन टेक्नॉलॉजी’, नऱ्हे येथे होणार आहे. सर्व क्षेत्रांत महिलांचा सहभाग, आर्थिक निर्णयांत महिलांचा अंतर्भाव, महिला व तंत्रज्ञान, महिला आणि डिजिटल कौशल्ये आदी विषयांवर चर्चा होणार आहे.’’

परिषदेचे उद्घाटन राज्याचे उच्‍च व तंत्र शिक्षण मंत्री चंद्रकांत पाटील यांचे हस्ते होणार आहे. एस.एन.डी.टी महिला विद्यापीठाच्या (मुंबई) कुलगुरू डॉ. उज्ज्वला चक्रदेव, महाराष्ट्र युनिव्हर्सिटी ऑफ हेल्थ सायन्सेसच्या कुलगुरू डॉ. माधुरी कानिटकर आदी उपस्थित राहणार आहेत. असे देव यांनी सांगितले.