वाघोली - पहिल्या श्रावणी सोमवार निमित्त वाघोलीतील वाघेश्वर मंदिरात हर हर महादेवचा जयघोष करण्यात आला. दिवसभरात हजारो भाविकांनी दर्शन घेतले. मंदिर फुलांनी आकर्षक सजविण्यात आले होते.

पुणे नगर महामार्गालगत असणारे वाघेश्वर मंदिर हे पुरातन कालीन मंदिर आहे. मंदिराच्या बाजूला तळे आहे. सकाळ पासूनच मंदिरात दर्शनासाठी भाविकांची गर्दी झाली होती. रस्त्यापर्यंत रांग लागली होती. मंदिराला प्रवेश द्वारपसून फुलांनी आकर्षक सजविले होते. अधून मधून पावसाच्या सरी पदात होत्या. तरी भाविक रांगेत दर्शनासाठी उभे होते. या भाविकांना संतोष व संदीप जाधव कुटुंबियांच्या वतीने प्रसाद वाटप करण्यात आला. भाविकांनी रांगेत प्रसादाचा लाभ घेतला.

मंदिराबाहेर अनेक दुकाने थाटण्यात आली होती. तेथे खरेदीचा व तळ्यात बोटिंग चां आनंद भाविकांनी लुटला. सुमारे ७० लाख रुपये खर्चुन मंदिराच्या वज्रलेपाचे काम पूर्ण करण्यात आले आहे. तसेच सात गायमुख, रेलिंग, वीज रोधक यंत्र आदी कामे नुकतीच करण्यात आल्याची माहिती वाघोली विकास प्रतिष्ठानचे अध्यक्ष राजेंद्र सातव यांनी दिली.

भाविकांनी दक्ष राहावे

गर्दीचा फायदा घेवून अंगातील दागिने चोरून नेण्याच्या घटना घडतं आहे. अशीच घटना सोमवारी मंदिर परिसरात घडली. एका महिलेचे गळ्यातील गंठण चोरीला गेले. भाविकांनी अंगावरील दागिने दिसू नये याची काळजी घ्यावी तसेच दक्ष राहावे. असे आवाहन प्रतिष्ठानचे अध्यक्ष राजेंद्र सातव व लोणीकंदचे वरिष्ठ पोलीस निरीक्षक पंडित रेजितवाड यांनी केले आहे.