खडकवासला : शिवणे, उत्तमनगर, कोंढवे- धावडे, कोपरे ही गावे महापालिकेत आली आहे. या गावांत महाराष्ट्र जीवन प्राधिकरणाची योजना आहे. ही योजना पालिकेला हस्तांतरित करण्यासाठी योजनेला झालेला १८कोटी रुपयांचा खर्च द्यावा. असे प्राधिकरणाने पालिकेला सांगितले आहे. दरम्यान, प्राधिकरणाने मागितलेली पूर्ण रक्कम रद्द करून योजना थेट पालिकेला द्यावी. अशी मागणी राष्ट्रवादी काँग्रेसचे अध्यक्ष शरद पवार यांच्याकडे माजी उपमहापौर, नगरसेवक दिलीप बराटे यांनी केली आहे.

महापालिकेने वारजेची स्वतंत्र पाणी योजना २००५मध्ये केली. त्यामुळे, वारजे येथील पूर्वीची जीवन प्राधिकरणाची पाणी पुरवठा योजना शिवणे, उत्तमनगर, कोंढवे- धावडे, कोपरे या गावांना दहा वर्षापूर्वी हस्तांतरीत केली होती. ही चार गावे समाविष्ठ झाल्याने गावांची जीवन प्राधिकरणाची पाणी योजना हस्तांतरीत झाली पाहिजे. पाणी योजना करताना शासनाच्या नियमाप्रमाणे त्यावेळी १५ टक्के रक्कम ग्रामपंचायतीने भरली आहे. तरी देखील योजना हस्तांतरीत करण्यासाठी प्राधिकरणाने १८कोटीची मागणी केली आहे. असे बराटे यांनी पवारांना दिलेल्या पत्रात म्हटले आहे. यावेळी राष्ट्रवादी काँग्रेसचे ग्रामीणचे खडकवासला मतदार संघ अध्यक्ष त्रिंबक मोकाशी, जिल्हा परिषद सदस्या अनिता इंगळे उपस्थित होते.

ही रक्कम अवास्तव असल्याने महापालिकेने ही रक्कम दिलेली नाही. त्यामुळे येथील रहिवाशी दोन्ही यंत्रणेच्या निर्णयात अडकलेले आहे. गावे पालिकेत आल्याने पाणी पुरवठा करण्याची जबाबदारी पालिकेची आहे. रक्कम न दिल्याने योजना पालिकेच्या ताब्यात आली नाही. या चार गावातील लोकसंख्या मागील १० वर्षात दुप्पट झाली आहे. काही भागात पाणी पुरवठा सुरळीत होत नाही. तसेच, प्राधिकरणाच्या पाण्याचा दर पालिकेपेक्षा जास्त आहे. त्याची झळ नागरिकांना सोसावी लागत आहे. असे पत्रात म्हटले आहे. दरम्यान, या चार गावांची पाणी योजना कोणतीही रक्कम न देता पालिकेला द्यावी. याबाबत राष्ट्रवादी काँग्रेसचे प्रदेशाध्यक्ष व जलसंपदा मंत्री जयंत पाटील यांच्याशी भेटून माहिती दिली आहे.

वारजे १९९७ साली पालिकेत आले. त्यावेळी, वारजेची महाराष्ट्र जीवन प्राधिकरणाची योजना पालिकेला देताना कोणतीही रक्कम पालिकेने प्राधिकरणाला दिली नव्हती.

-दिलीप बराटे, माजी उपमहपौर