पिंपरी - निम्म्या शहराला अपुरा पाणीपुरवठा सुरू असतानाच पवना धरणातही यंदा कमी पाणीसाठा असल्याचे जलसंपदा विभागाने स्पष्ट केले. निश्‍चित केलेल्या कोट्यापेक्षा जादा पाणी शहराला पुरविले जात असल्यामुळे शहरवासीयांनी पाण्याची बचत करावी, अशी सूचना जलसंपदा विभागाच्या अधिकाऱ्यांनी केली आहे.

पुणे शहरात पाणीकपातीच्या मुद्यावरून संघर्ष पेटला आहे. पिंपरी-चिंचवडमध्ये अपुऱ्या पाणीपुरवठ्यामुळे नागरिक संतप्त आहेत. राष्ट्रवादी काँग्रेसचे नगरसेवक सुलक्षणा धर, मयूर कलाटे यांनी त्याबाबत विचारलेले प्रश्‍न महापौर राहुल जाधव यांनी स्वीकारले नाहीत. तरीही संतप्त नगरसेवक सर्वसाधारण सभेत पाणीसमस्येला वाचा फोडण्याची शक्‍यता आहे.

जलसंपत्ती नियमन प्राधिकरणाने शहरातील प्रतिव्यक्तीला रोज १३५ लिटर पाणी देण्यास सांगितले आहे. वहनव्यय धरून प्रतिव्यक्तीसाठी १५५ लिटर पाणी दिल्यास शहरातील सुमारे २२ लाख लोकांसाठी वर्षाला ४.४० अब्ज घनफूट (टीएमसी) पाणी पुरेसे ठरते. पिंपरी-चिंचवडसाठी ४.८४ टीएमसी पाणी मंजूर करण्यात आले आहे. सध्या शहराला ६.११ टीएमसी पाणी पुरविले जाते. त्यामुळे शहराला मंजूर कोट्यापेक्षा सव्वा टीएमसी जादा पाणी पुरविले जात असल्याचे जलसंपदा विभागाचे म्हणणे आहे.

पवना धरणात १५ ऑक्‍टोबरला ७.९९ टीएमसी (९३.९ टक्के) उपलब्ध आहे. यंदा चार सप्टेंबरनंतर धरणात पाणीसाठा वाढला नसल्याने आहे त्या साठ्यातूनच पिण्यासाठी पाणीपुरवठा केला जात आहे. सिंचन आणि बिगरसिंचन यासाठी रोज सरासरी २८.५० दशलक्ष घनफूट पाणी लागते. पुढील वर्षी १५ जुलैपर्यंत पाणी पुरेल, असे नियोजन १५ ऑक्‍टोबरला केले जाते. सध्याचा साठा विचारात घेतला, तर सरासरी पाणीवापरानुसार ते पाणी २७ जूनपर्यंत पुरेल. त्यामुळे सर्वांनीच पाण्याचा वापर काटकसरीने करावा, असे जलसंपदा विभागाच्या अधिकाऱ्यांनी सोमवारी सांगितले.

शहरवासीयांना प्रतिव्यक्ती रोज दोनशे लिटरपेक्षा जास्त पाणी धरणातून दिले जाते. पुढील वर्षी एल निनो सक्रिय होण्याची शक्‍यता आहे. त्यामुळे पावसाळा लांबण्याची शक्‍यता आहे. यंदा धरणात गेल्या वर्षीच्या तुलनेत कमी साठा आहे. आतापासूनच सिंचन व बिगर सिंचनाचे पाणी जपून वापरल्यास ते सर्वांना पुरेशा प्रमाणात देता येईल.
- नानासाहेब मठकरी, उपअभियंता, पवना धरण