पुणे - ‘रेन वॉटर हार्वेस्टिंग’ म्हणजे नेमके काय, याची यंत्रणा कशी उभारावी आणि त्याचे महत्त्व काय, या बाबत सोसायट्यांमध्ये जनजागृती करण्याचे काम आयटीतील नोकरदार संदीप शिंदे करीत आहेत. सोसायट्यांमध्ये जाऊन ते रहिवाशांना ‘रेन वॉटर हार्वेस्टिंग’चे महत्त्व कार्यशाळेद्वारे पटवून देत आहेत. तसेच घरोघरी पत्रके वाटून ही यंत्रणा बसविण्यासाठी सोसायट्यांना ते उद्युक्त करत आहेत.  

‘रेन वॉटर हार्वेस्टिंग’ ही काळाची गरज असून, भविष्याच्या दृष्टीने सोसायट्यांनी त्याबाबत पावले उचलावीत, यासाठी  सोसायट्यांमधील रहिवाशांना जागृत करण्यासाठी संदीप यांनी ‘जल ही जीवन’ हा प्रकल्प हाती घेतला आहे. कंचन स्टोन मेटल वर्क्‍स या कंपनीत विक्री व्यवस्थापक म्हणून काम करणाऱ्या संदीप यांनी नुकताच लॅंडमार्क संस्थेचा स्व-परिवर्तन घडवून आणणारा कोर्स पूर्ण केला. त्याअंतर्गत त्यांनी हा प्रकल्प राबविण्याचे ठरवले. ‘रेन वॉटर हार्वेस्टिंग’ची यंत्रणा कशी बसवावी, यापासून त्यासाठी लागणाऱ्या खर्चापर्यंत... पावसाचे पाणी साठवण्याच्या प्रक्रियेपासून पाण्याच्या वापरापर्यंत...अशी सर्व माहिती सोसायट्यांपर्यंत पोचविण्याचे काम संदीप करत आहेत. आयटी क्षेत्रातील व्यग्र दिनक्रमातून काही वेळ ते सामाजिक उपक्रमासाठी देत असून, त्यांनी सोसायट्यांमध्ये घेतलेल्या कार्यशाळेला प्रतिसाद मिळत आहे. 

पर्यावरणाचा होणारा ऱ्हास पाहता नागरिकांनी पाणी बचतीसाठी पावले उचलायला हवीत. ‘रेन वॉटर हार्वेस्टिंग’ हा त्याचाच एक भाग आहे. पावसाचे पाणी साठवून ते सोसायट्यांतील रहिवासी कधीही वापरू शकतात. म्हणून ही यंत्रणा बसवावी. 
- संदीप शिंदे, विक्री व्यवस्थापक, कंचन स्टोन मेटल वर्क्‍स