पिंपरी - शहराला पाणीपुरवठा करणाऱ्या पवना धरणातील पाणीसाठा उन्हामुळे झपाट्याने कमी होत आहे. यामुळे गेल्या महिन्यापासून महापालिकेने आठवड्यातून एक दिवस कपात सुरू केली आहे. मात्र आता सोमवारपासून (ता. 6) एक दिवसाआड पाणीपुरवठा करण्याचा निर्णय महापालिकेने घेतला आहे. 

धरणाची साठवणक्षमता 8.51 टीएमसी आहे. यंदा गुरुवारपर्यंतचा (ता. 2) धरणातील पाणीसाठा 2.52 टीएमसी म्हणजे 30 टक्‍क्‍यांपेक्षाही खाली आला आहे. गतवर्षी तो 3.18 टीएमसी होता. यामुळे जूनच्या मध्यापर्यंतच पाणी पुरेल, अशी स्थिती असल्याने 15 जुलैपर्यंतचे नियोजन करावे लागणार आहे. याबाबत सहशहर अभियंता मकरंद निकम म्हणाले, ""दैनंदिन पाणीपुरवठ्यामध्ये 25 टक्‍क्‍यांपेक्षा जास्त कपात केल्यास उंच भागात कमी पाणी मिळते. याचा विचार करून कपातीनंतर सर्व नागरिकांना व्यवस्थित पाणी मिळावे, यासाठी एक दिवसआड पाणीपुरवठा करण्याचे नियोजन केले आहे.'' जलसंपदा विभागातील पवना धरणाचे उपअभियंता ए. एम. गडवाल म्हणाले, ""धरणातील सध्याचा पाणीसाठा 25 जूनपर्यंत पुरणारा आहे. गतवर्षी ऑगस्टमध्ये धरण भरल्याने पाणी सोडावे लागले. त्यानंतर पाऊसच न झाल्याने पाणीसाठा कमी राहिला.''