Pune News : पुणे शहरात गेल्या दोन वर्षांच्या तुलनेत यंदा जानेवारी उबदार ठरला. थंडीचे दिवस कमी झालेच पण, किमान तापमानाचा पाराही सरासरीपेक्षा जास्त नोंदला, असे निरीक्षण हवामान खात्यातर्फे नोंदविण्यात आले.

पुण्यातील शिवाजीनगर येथील वेधशाळेत २०२१ मध्ये जानेवारीतील नीचांकी तापमान १२.३ अंश सेल्सिअस नोंदले गेले होते. त्यावर्षी पुण्यात जानेवारीतील पाचवे उच्चांकी किमान तापमान १८ जानेवारीला (१८.१ अंश सेल्सिअस) नोंदले गेले. त्या वर्षात जानेवारीमध्ये एकही दिवस किमान तापमानाचा पारा एक अंकांपर्यंत खाली घसरला नसल्याचेही हवामान खात्यातर्फे दिलेल्या माहितीतून स्पष्ट होते.

पुण्यात २०२१च्या जानेवारीमधील तुलनेत २०२२ आणि २०२३ या दोन्ही वर्षांमध्ये थंडीचे दिवस वाढले. या दोन्ही वर्षी सहा दिवस किमान तापमानाचा पारा १० अंश सेल्सिअसपेक्षा खाली गेला होता.

जानेवारी २०२२ मध्ये किमान तापमान ८.५ आणि २०२३ मध्ये ७.४ अंश सेल्सिअसपर्यंत कमी झाला होता. यंदा जानेवारीमध्ये अवघे दोन दिवस थंडी होती. त्यात किमान तापमानाचा पारा ८.६ अंश सेल्सिअसपर्यंत नोंदला गेला. हे यंदाच्या जानेवारीतील नीचांकी किमान तापमान ठरले.

पुण्यात २०२१ मध्ये जानेवारीतील किमान तापमानाची सरासरी १५.७ अंश सेल्सिअस होती. हे २०२१ ते २०२४ या वर्षांमधील सर्वाधिक उबदार वर्ष ठरले. मात्र, त्यानंतर पुढील दोन वर्षांमध्ये किमान तापमानाची सरासरी १२.४ (२०२२) आणि १२ (२०२३) अंश सेल्सिअसपर्यंत कमी झाली.

या वर्षी पुन्हा १३.४ अंश सेल्सिअसपर्यंत किमान तापमानाची सरासरी वाढली. त्यामुळे गेल्या दोन वर्षांच्या तुलनेत यंदाचा जानेवारी उबदार ठरल्याचे खात्याने दिलेल्या माहितीवरून स्पष्ट होते.

थंडीचे दिवस का कमी झाले?

उत्तर भारतातून येणाऱ्या थंड आणि कोरड्या वाऱ्यांच्या प्रभावामुळे पुण्यासह महाराष्ट्रात थंडीची लाट निर्माण होते. या वर्षी उत्तरेतून येणाऱ्या थंड वाऱ्यांचा प्रभाव कमी राहिला. त्याचे प्रमुख कारण म्हणजे वेस्टर्न डिस्टर्बन्स हे आहे.

थंडीचे दिवस कमी होण्याचा आणि प्रशांत महासागरातील उष्ण प्रवाह असलेल्या ‘एन निनो’चा काही संबंध आहे का, याबद्दल संशोधन होणे आवश्यक आहे.