पुणे - ‘मला पुण्यात कार्यक्रम सादर करायला खूप आवडते. मी सुगम संगीत, शास्त्रीय संगीतापासून फ्युजनपर्यंतचे अनेक प्रयोग पुण्यात केले आहेत. पुण्यातील प्रेक्षकांची दाद माझ्यासाठी कायमच महत्त्वाची राहिली आहे. सवाई गंधर्व महोत्सवात पुण्याच्या प्रेक्षकांनी मला दिलेली दाद अजूनही स्मरणात आहे,’’ अशी भावना प्रसिद्ध संगीतकार, गायक शंकर महादेवन यांनी व्यक्‍त केली. ते पुण्यात नुकतेच एका कार्यक्रमासाठी आले होते.

ताज्या बातम्यांसाठी डाऊनलोड करा ई-सकाळचे ऍप

शंकर महादेवन म्हणाले, ‘‘मी पुण्यात विविध अवतारांमध्ये दाखल झालो आहे. याच शहरातील जर्मन बेकरीमध्ये मला ‘कल हो ना हो’ या गाण्याची चाल सुचली होती. येथे नाश्‍ता करीत असताना मी, एहसान व लॉय याच गाण्यावर विचार करीत होतो. ज्या बेकरीत ही चाल सुचली, तिथेच नंतर बाँबस्फोट झाले आणि या गाण्यातील जावेद अख्तर यांनी लिहिलेले शब्द त्या बेकरीचेच मनोगत सांगून गेल्याचे आम्हाला जाणावले. या सर्व घटनांमुळे मला पुण्यात यायला आणि गायला खूप भावते. मी सॉफ्टवेअर इंजिनिअर आहे; मात्र, या आयटी सिटीमध्ये मी कामासाठी नव्हे,  तर केवळ गायनासाठीच आलो आहे.’

अजित पवार आणि हर्षवर्धन पाटील आले एकत्र; काय झाली चर्चा?

फ्युजन संगीत व त्याच्या सादरीकरणाबद्दल महादेवन म्हणाले, ‘‘ही कला तशी खूप जुनी आहे आणि अनेक भारतीय संगीतकारांनी तिचा उपयोग केला आहे. मात्र, फ्युजन सादर करताना गायकासह प्रत्येक वादक त्याच्या क्षेत्रातील तज्ज्ञ असल्यासच अपेक्षित परिणाम साधला जातो. गोव्यात मी फ्युजन सादर केल्यानंतर अमिताभ बच्चन आणि रजनीकांत या महानायकांनी त्याला दाद दिली आणि ही माझ्यासाठी अविस्मरणीय गोष्ट होती.’’

भविष्यातील प्रकल्पांबद्दल बोलताना ते म्हणाले, ‘‘आम्ही ‘छपाक’ या दीपिका पदुकोणची प्रमुख भूमिका असलेल्या चित्रपटासाठी संगीत दिले आहे. ॲसिड हल्ला झालेल्या तरुणीची ही गोष्ट दीपिकाने अभिनय केल्यानं दहापट परिणामकारकतेने प्रेक्षकांपर्यंत पोचेल. यातील साध्या व अर्थपूर्ण गाण्यांना संगीत देताना कामाचे समाधान मिळाले. ‘राझी’ चित्रपटातील ‘दिलबरो’सारखे गाणी ‘बिदाई अन्थम’ बनतात तेव्हा खूप आनंद होतो. माझी दोन्ही मुले शास्त्रीय संगीताची परंपरा पुढे नेत आहेत, याचा मला विशेष आनंद होतो.