Pune News : मुन्ना पोळेकर, नामदेव कानगुडे, विठ्ठल गांदले या त्रिकुटाने वेळोवेळी झालेला अपमान, मारहाणीचा बदला घेण्यासाठी शरद मोहोळला संपविले. मात्र त्यांच्या मनातील खदखद ओळखून त्यांना शस्त्र, पैसा पुरविणारा ‘मास्टरमाइंड’ कोण, हा प्रश्‍न उपस्थित झाला आहे. या खुनाशी गुन्हेगारी टोळ्यांचे ‘कनेक्‍शन’ असण्याची शक्‍यता आहे. त्यादृष्टीने पोलिस तपासाला दिशा देत आहेत.

मोहोळच्या घरापासून काही अंतरावर राहणारा पोळेकर प्रारंभी त्याच्या साथीदारांसह फिरू लागला होता. आठ ते दहा दिवसांपासून तो थेट मोहोळसोबत दिसत होता. त्याने मोहोळ व साथीदारांचा विश्‍वास संपादन केला.

त्याने मोहोळला लग्नाच्या वाढदिवशीच संपविले. पोलिसांनी वेगाने हालचाल करून आठ आरोपींना तत्काळ अटक केली. जमिनीचा वाद व अपापसातील भांडणामुळे खून केल्याचे आरोपींनी पोलिसांना सांगितले आहे, मात्र यास अनेक धागेदोरे असण्याची शक्‍यता वरिष्ठ पोलिस अधिकाऱ्यांनी व्यक्त केली.

...त्यांची ‘स्टोरी’ खरी आहे !

पोलिसांनी आरोपींची कसून चौकशी केली. त्यांच्या माहितीची खातरजमा करण्यात आली. मोहोळचे साथीदार, खबरे व अन्य तांत्रिक माहितीच्या आधारे पडताळणी करण्यात आली. त्यानुसार आरोपींनी सांगितलेल्या घटना प्रत्यक्षात घडल्या असून ते खोटे बोलत नसल्याचे पोलिसही मान्य करतात. अशावेळी मोहोळला संपविण्याची इतर कारणे काय होती, याकडे आता सगळ्यांचे लक्ष लागले आहे.

खुनाचे नेमके कारण?

मुख्य आरोपी पोळेकर याचा मामा कानगुडे याच्याशी मोहोळचे झालेले भांडणे हे प्रमुख कारण सध्या पुढे येत आहे. पोलिसांनीही आतापर्यंत त्यानुसार तपास केला आहे. मात्र मोहोळ याच्यासारख्या टोळीप्रमुखाचा खून किरकोळ वैयक्तिक कारणातून कसा होऊ शकतो, हा प्रश्‍न पोलिसांनाही पडला आहे.

मोहोळचे राजकीय, वैयक्तिक मतभेद; माथाडी, जमीन व गुन्हेगारी टोळ्यांबरोबरील जुने वाद अशी काही महत्त्वाची कारणे असण्याची शक्‍यता नाकारता येत नाही. त्यादृष्टीने तपास करत असल्याचे या अधिकाऱ्यांनी स्पष्ट केले.