किरकटवाडी : मागील सुमारे वर्षभरापासून वीजबिल थकल्याने महावितरणने खडकवासला येथील आंगणवाडीचे मीटर दोन महिन्यांपूर्वी काढून नेले आहे. परिणामी फॅन, प्रोजेक्टर, इलेक्ट्रॉनिक वजनकाटा अशी सर्व विद्युत उपकरणे बंद आहेत. थकलेल्या वीजबिलाचा भरणा जिल्हा परिषदही करत नाही व अजून शिक्षण विभाग पालिकेकडे हस्तांतरित न झाल्याने पालिकाही याची जबाबदारी घेत नाही. परिणामी प्रशासनाच्या वादात चिमुकल्यांना मात्र नाहक त्रास सहन करावा लागत आहे.

30 जून 2021 रोजी खडकवासला गावचा पुणे मनपा हद्दीत समावेश करण्यात आला. तोपर्यंत ग्रामपंचायत कारभार पाहत असल्याने गावातील शाळा व अंगणवाड्यांच्या वीजबिलाचा नियमित भरणा करण्यात येत होता. गाव पालिकेत गेले मात्र शिक्षण व आरोग्य विभाग अद्यापही पालिकेकडे हस्तांतरित करण्यात आलेला नाही. परिणामी पालिकेने मागील सुमारे वर्षभरापासून अंगणवाडीचे वीजबिल भरलेले नाही. महावितरणने मात्र वीजबिल थकल्याने दोन महिन्यांपूर्वी मीटर काढून नेले आहे. सध्या या अंगणवाडीत चाळीस मुले-मुली येतात. उन्हाळ्यातही अंगणवाडी सुरू होती मात्र विद्युतपुरवठा खंडीत असल्याने चिमुकल्यांना नाहक गैरसोय सहन करावी लागत आहे.

" लहान मुलांच्या मनोरंजनासाठी असलेली सर्व उपकरणे लाईट अभावी बंद आहेत. त्यामुळे माझी मुलगी अंगणवाडीत बसण्याचा कंटाळा करते. उन्हाळ्यात तर खुप वाईट अवस्था होती. पालिकेने काहीतरी मार्ग काढावा."

- सिद्धार्थ भोसले, पालक, खडकवासला.

"अंगणवाडी अत्यंत सुसज्ज बनविण्यात आलेली आहे. केवळ विजेअभावी सर्व उपकरणे बंद असणे हे आपल्या व्यवस्थेचं दुर्दैव आहे. सर्वात महत्त्वाचे म्हणजे याचा त्रास चिमुकल्यांना सहन करावा लागत आहे. शासनाने याबाबत तोडगा काढणे गरजेचे आहे."

- ॲड. अनुराधा मते, नागरिक, खडकवासला.

" अंगणवाडीचा वीजपुरवठा खंडीत असल्याने अनेक पालकांच्या तक्रारी आहेत.सिंहगड रोड क्षेत्रीय कार्यालयाला याबाबत वारंवार कळविले आहे. पालिकेचे अधिकारी जिल्हा परिषदेकडे व जिल्हा परिषदेचे अधिकारी पालिकेकडे बोट दाखवत आहेत."

- सौरभ मते, माजी सरपंच, खडकवासला.

" शिक्षण विभाग अद्याप पालिकेच्या शिक्षण मंडळाकडे हस्तांतरित करण्यात आलेला नाही. त्यामुळे उत्तरदायित्व निश्चित झालेले नाही. संबंधित विभागाला याबाबत कळविण्यात येईल." - प्रदीप आव्हाड, सहाय्यक आयुक्त, सिंहगड रोड क्षेत्रीय कार्यालय, पुणे मनपा.