पारगाव : मेंगडेवाडी (गवारीमळा) ता.आंबेगाव येथे आज शनिवारी दुपारी विश्वनाथ बापु गवारी (वय ८५ वर्ष या ) या शेळ्या सांभाळत असलेल्या वृद्धावर तरसाने हल्ला केला. मालकावर हल्ला केल्याचे पाहुन दोन पाळीव कुत्रे आणि शेळ्यांनी तरसावर एकत्रित हल्ला चढविल्याने तरस ठार झाला. परंतु श्री. गवारी गंभीर जखमी झाले. तरसाच्या हल्ल्यात रक्तबंबाळ झालेले शेतकरी यांच्यावर मंचर उपजिल्हा रुग्णालयात उपचार सुरु आहेत.

गवारीमळा येथील शेतकरी विश्वनाथ गवारी हे आपल्या १० ते १३ शेळ्या डोंगरच्या पायथ्याशी चारण्यासाठी कुत्र्यासह घेवुन गेले होते.चारा खाल्ल्यानंतर शेळ्या उजव्या कालव्याला डोंगराला असलेल्या बोगद्याजवळ साचलेले पाणी पिण्यासाठी कालव्यात उतरल्या. त्यावेळी शेतकरी विश्वनाथ गवारी हे शेळ्यांलगत बसले. त्याचवेळी अचानक आलेल्या तरस हिंस्त्र प्राण्याने काही कळण्याच्या आतच शेतकरी विश्वनाथ गवारी यांच्यावर पाठीमागून हल्ला केला. हिंस्त्र प्राणी आणि वृद्ध शेतकऱ्याची सुमारे अर्धा तास झटापट झाली.

गवारी यांचा उजव्या हाताचा पंजा, दोन्ही हाताचा कोपरा, डाव्या पायाच्या पोटऱ्यानजीक आणि उजव्या कानाच्या पाळीवर हल्ला केला. आपला मालकांवर हिंस्त्र प्राण्याने हल्ला केल्याचे पाहून त्यांचे पाळीव दोन कुत्रे, तीन शेळ्या गवारी यांच्या मदतीस धावून गेल्या. शेळ्यांचा रुद्रावतार आणि त्यांची शिंगे तसेच कुत्र्याने हिंस्त्र प्राण्यावर जोरदार हल्ला केल्याने त्या हिंस्त्र प्राणी जागीच ठार झाला, तर वृद्ध शेतकरी जखमी झाला.

याच दरम्यान विश्वनाथ गवारी यांची आरडाओरड ऐकून आजुबाजुस काम करत असलेले शेतकरी मदतीसाठी आले. जखमी अवस्थेत त्यांना मंचर उपजिल्हा रुग्णालयात वैद्यकीय उपचारासाठी आणले असुन त्यांची प्रकृती स्थिर असल्याचे डॉक्टरांनी सांगितले आहे. केवळ शेळ्या आणि कुत्र्यामुळे आपला जीव वाचल्याची प्रतिक्रिया जखमी शेतकरी गवारी यांनी दिली. शेतकऱ्यांनी हिंस्त्र प्राण्याची बारकाईने पाहणी केली असता हा प्राणी तरस असल्याचे सांगण्यात येत आहे. तालुक्याच्या पूर्व भागात बिबट्या बरोबर तरसाचे हल्ले वाढू लागल्याने नगरिकांमध्ये घबराट पसरली आहे वनविभागाने तरसांचा बंदोबस्त करून जखमी विश्वनाथ बापु गवारी यांना मदत करावी अशी मागणी उपसरपंच विशाल गवारी यांनी केली आहे.