इंदापूरच्या वनक्षेत्रात मुबलक गवत आणि पाणी उपलब्ध

कळस (पुणे) : पावसाळ्यानंतरच्या पावसाने एकीकडे शेतकऱ्यांचे नुकसान झाले असताना, दुसरीकडे याच पावसाचा वनक्षेत्र व वन्यजीवांना फायदा झाला आहे. इंदापूर तालुक्‍यातील वनात लावलेल्या रोपांना या पावसामुळे जीवदान मिळाले आहे. तसेच, हिरवा चारा उपलब्ध झाल्याने "चिंकारा'चे कळप सर्रास दिसत आहेत.

तालुक्‍यात सुमारे 6 हजार 100 हेक्‍टर वनक्षेत्र असून,यात चिंकारा जातीची हरणे, ससे, लांडगे, कोल्हे, तरस यांसारख्या प्राण्यांबरोबरच, विविध पक्षी, सरपटणारे प्राणी आढळतात. यात चिंकारा हरणांची संख्या अधिक आहे. हरणासाठी वनक्षेत्रात हिरवे लुसलुशीत गवत मोठ्या प्रमाणात उपलब्ध झाले आहे. आगामी काही दिवस हे गवत वन्यप्राण्यांना मिळणार आहे. या शिवाय वनक्षेत्रात वन्यजीवांच्या पाण्यासाठी 131 टाक्‍या बांधण्यात आल्या आहेत. टाक्‍यात पाणी उपलब्ध झाल्याने वन्यप्राण्यांचे वनाबाहेर येणेही कमी होणार आहे. या शिवाय शेतकऱ्यांना होणारा त्रास वाचणार आहे. गुराखी, मेंढपाळांचा वनातील प्रवेश रोखण्याचा प्रयत्न वन कर्मचाऱ्यांकडून होणे गरजेचे आहे.

तालुका वनपरिक्षेत्र अधिकारी राहुल काळे म्हणाले, ""वन व वन्यजीवांचे संरक्षण ही प्रत्येकाची जबाबदारी आहे. सामाजिक बांधिलकीच्या दृष्टिकोनातून प्रत्येकाकडून त्यासाठी प्रयत्न होणे गरजेचे आहे. विनापरवानगी वनात प्रवेश, वन्यजीवांच्या अधिवासाला धोका पोचेल, असे कृत्य करणाऱ्यांवर कायदेशीर कारवाई करण्यात येईल.''

 
...म्हणून हरणांची संख्या सर्वाधिक
कळस गावचे ग्रामदैवत हरणेश्वर असल्याने ग्रामस्थांचे हरणांसोबत धार्मिक नाते जोडलेले आहे. या ठिकाणी हरणांना दैवत मानले जात असल्याने त्यांच्याकडून होणारे उपद्रव ग्रामस्थ सहन करतात. परिसरात हरणांना अभय मिळाल्याने चिंकारा हरणांची संख्या सर्वाधिक आढळून येते.