जुनी सांगवी (पुणे) : सांगवी व परिसरात लिंगायत समाज मोठ्या प्रमाणात वास्तव्यास आहे. समाजाला स्वतंत्र स्मशानभूमी नसल्याने समाज बांधवांना इतरत्र जावे लागते. येथील लिंगायत समाजाच्या स्मशानभूमीसाठी जागा उपलब्ध करून देण्यासाठी वर्षभरात प्रयत्न करणार असल्याचे नगरसेवक हर्षल ढोरे यांनी सांगवी येथे वीरशैव लिंगायत समाजाच्या वतीने आयोजित शिवपुराण कथा ज्ञानयज्ञ सोहळा सांगता समारंभ प्रसंगी बोलताना व्यक्त केले.

अनेक वर्षांपासून या समाजाची ही मागणी आहे. आजपर्यंत ती पूर्ण झालेली नाही. त्यांची स्मशानभूमीची मागणी ही रास्त असून आम्ही सर्व प्रभागातील नगरसेवक आमदार लक्ष्मण जगताप यांच्या मार्गदर्शनाखाली व त्यांच्या सल्ल्यानुसार येत्या वर्ष भरात जुनी सांगवी येथे जागा उपलब्ध करून देण्याचा प्रयत्न करणार असल्याचे त्यांनी यावेळी सांगितले.

कार्यक्रमास नगरसेविका माई ढोरे, शारदा सोनवणे, सिनेट सदस्य संतोष ढोरे, सुभाष ढोरे, नारायण ढोरे, सातारा मित्र मंडळाचे शिवाजी माने, वीरशैव लिंगायत समाज संस्थेचे अध्यक्ष प्रकाश कानडे, सुरेश दंडवडे, संजय होनराव, माणिक धुरुपे, भीमाशंकर टोंगळे हे उपस्थित होते. या संस्थेचे सचिव सोमनाथ कोरे यानी प्रास्ताविक केले. कोरे म्हणाले, जुनी सांगवी, नवी सांगवी, पिंपळे गुरव परिसरात लिंगायत समाजाची तीन हजाराच्या जवळपास लोकसंख्या आहे. अंत्यविधीसाठी येथील समाज बांधवांना मोरवाडी येथे जावे लागते.तेथेही पुरेशी जागा उपलब्ध नसल्याने अडचणी येतात. सांगवी प्रभागातच जागा मिळाल्यास प्रश्न सुटेल. कार्यक्रमाचे सुत्रसंचलन प्रदीपकुमार देशमुख यांनी केले. तर महेश टींगरे, बळवंत हांचे, मधुकर खरोसे, अरुण शिंदे, अनिल जोतराव, अशोक देवणे, विजय केचे, साधना कोरे, संगीता धूरूपे, महादेवी दंडवडे, मंजुषा होनराव, भारत गणेशपुरे आदी समाज बांधव मोठ्या संख्येने उपस्थित होते.